Qytetarët ankohen për faturat e larta, EVN: Borxhet paguhen pasi printohen faturat

 

“Si është e mundur për pesë apo gjashtë ditë të vendoset një lloj kamate 100%, prej në 4,000 denarë, prapë në plus 4,034 denarë? Pra, në total është 8,050 denarë. Unë nuk e kuptoj si është e mundur vetëm për shkak se është vonuar pagesa e faturës të vendoset një dënim i tillë? Kur shkova në EVN të pyes, ata ma dhanë këtë përgjigje: “Për shkak të vonesës!”, - theksoi konsumatori, Baki Bakiju. 

 

Ndërsa nga kompania EVN morëm përgjigjen se ”nëse fatura mujore nuk paguhet deri në fund të muajit, atëherë fatura e muajit pasues shtypet dhe shpërndahet me borxhin e mbetur të muajit paraprak, pavarësisht se i njëjti mund të jetë paguar, borxhi figuron në faturë, sepse fatura është shtypur përpara se konsumatori të shlyejë borxhin e mbetur.

 

“Fatura për të cilën përdoruesi reagon është lëshuar më 31.10.2023, ndërsa përdoruesi ka paguar borxhin më 06.11.2023, që do të thotë se fatura tashmë është lëshuar dhe borxhi është paraqitur, i cili tashmë është paguar dhe nuk do të shfaqet në faturën e radhës.”, thonë nga EVN-ja.

 

Por, qytetari Bakiju thotë se kjo formë e faturimit të borxheve të paguara, është në dëm të xhepit të qytetarëve, pasi jo gjithsecili shkojnë në filialet e EVN-së për sqarime. Ai njëherit kërkon që EVN-ja, rastet me status të rrezikuar social t’i ndajë në kategori të veçantë, pasi këto familje nuk kanë mundësi të paguajnë faturat mujore, e aq më pak dënimet e shqiptuara.