Kurti i shkruan OSBE-së: Pa marrëveshje s’ka zgjedhje serbe në Kosovë

 

“Lidhur me çështjen e bashkëpunimit ndërshtetëror për votimin jashtë vendit, me qëllim që të mundësohet qytetarët e komunitetit serb në Kosovë me shtetësi të dyfishtë të votojnë në zgjedhjet serbe jashtë Zyrës Ndërlidhëse të Serbisë në Kosovë, është e nevojshme një marrëveshje e veçantë ndërmjet Republikës së Kosovës dhe Serbisë. Kërkesa për këtë marrëveshje duhet të vijë nga Serbia si palë e interesuar. Dhe çdo kërkesë e tillë duhet të marrë për bazë sovranitetin dhe pavarësinë e Kosovës, si shtet i barabartë, në përputhje me nenin 2 të Marrëveshjes Themelore të arritur këtë vit ndërmjet Kosovës dhe Serbisë.”, thuhet në letrën që Kurti i ka kthyer shefit të OSBE-së.

 

Kurti inkurajon Serbinë që të negociojë një marrëveshje të tillë speciale me Republikën e Kosovës, duke zbatuar në këtë mënyrë edhe një detyrim tjetër të Marrëveshjes Themelore, siç janë, “marrëdhëniet e fqinjësisë së mirë, në bazë të të drejtave të barabarta dhe reciproke dhe të drejtat e votuesve jashtë vendit”. OSBE-ja, viteve të mëhershme ka ndërmjetësuar për votimin e serbëve të Kosovës për zgjedhjet në Serbi. Por, kjo praktikë u ndërpre me ardhjen e Kurtit në krye të Qeverisë së Kosovës, duke mos u lejuar serbëve të Kosovës që të votojnë për zgjedhje në Serbi pa marrëveshje reciproke. Në zgjedhjet e fundit, serbët e Kosovës u organizuan me autobusë dhe vetura për të votuar në komunat e Serbisë afër Kosovës.