Kriza në vend, Besimi: PE kërkon përgjegjësi për keqpërdoruesit

Këto janë mesazhet që zëvendëskryeministri, Fatmir Besimi, ka marrë nga Parlamenti Evropian në takimin me sekretarin gjeneral, Alen Leroa, dhe takimet e tjera të realizuara gjatë ditës së djeshme në Parlamentin Evropian. 

 

“Mesazhet ishin të qarta prej këtu. Kërkohet që institucionet dhe personalitetet e involvuar të mbajnë përgjegjësi për atë që kanë bërë, ose kanë pasur keqpërdorime. E dyta është që dialogu politik është shumë i rëndësishëm dhe duhet të rivendoset, dhe është urgjent. Dhe e treta është që procesi juridik të ndodh në kuadër të institucioneve me kredibilitet, duke ruajtur parimet e sundimit të ligjit, gjyqësor i pavarur dhe procedurë transparente”- deklaroi zëvendëskryeministri, Fatmir Besimi.

 

Që procedimi i rasteve në gjykata dhe në hetuesi të jetë transparent, korrekt dhe i paanshëm, BE është e gatshëm të japë ekspertizë.    

 

Ndërkaq, tejkalimi i krizës politike vlerësohet si emergjencë kombëtare që duhet tejkaluar sa më shpejtë që të jetë e mundur. Për tejkalimin e krizës politike PE ka ofruar ndihmën e saj.

 

“Sa i përket procesit politik, BE ka ofruar tashmë një mundësi dhe ajo është bashkëpunimi me grupin e parlamentarëve evropianë, treshja e cila duhet të ndihmojë dialogun dhe Maqedonia duhet të përgjigjet pozitivisht në këtë”- tha Besimi.

 

Kriza politike në Maqedoni u thellua edhe më shumë pas skandalit me përgjimet në masë dhe publikimit të materialeve komprometuese për zyrtarët e lartë qeveritarë, ku kryesisht flitet për keqpërdorime zgjedhore, keqpërdorime financiare dhe keqpërdorim të aparatit shtetëror për interesa partiake.