Reshjet e borës në Shqipëri, janë bllokuar disa akse rrugor

 

Kalimi është i pamundur edhe me zinxhirë, ndaj policia e Dibrës ka apeluar që drejtuesit e automjeteve të përdorin aksin rrugor Klos-Burrel-Ulëz.

 

Trashësia e borës në zonën e Dibrës arrin deri në 50 cm në zonat e thella. Në aksin nacional Bulqizë-Peshkopi, pranë zonës së quajtur “Pishat” një mjet doli nga rruga, por pa dëme në njerëz.

 

Në aksin Peshkopi-Maqellarë për shkak të reshjeve të dëborës janë bllokuar 100 automjete. Ndërkaq, i gjithë qarku është pa energji elektrike pasi rrjeti është dëmtuar nga thyerja e pemëve.

 

Edhe në Qafë-Thanë ka akse të bllokuara për shkak të reshjeve intensive të dëborës. Autoritete dhe kontraktorët po punojnë me 4 borëpastruese për kriposjen dhe hapjen e rrugës. Problematikat më të mëdha janë në aksin Prrenjas-Qafë thanë dhe Qafë Thanë-Pogradec.

 

Në qarkun e Kukësit, dëbora i ka kaluar 30 cm. Intensiteti i reshjeve, krijoi probleme në Rrugën e Kombit, sidomos në segmentin Fushë Dukagjin - Tuneli i Kalimashit. Kamionë e mjete të vogla u bllokuan për pak kohë në rrugë.

 

Në Shkodër, reshje pati në Dukagjin, Shalë, Pult dhe malet e Pukës. Në bashkinë Malësi e Madhe, zonat turistike të Bogës e razmës u veshën gjithasht me petkun e dëborës. Firmat kontraktuese po punojnë për të mbajtur të hapur, segmentin rrugorë Bogë - Theth.

 

Në këtë situatë autoritetet përsërisin thirrjen që të shmangen lëvizjet dhe kur kjo nuk është e mundur, të bëhet kujdes, të përdoren goma dimërore dhe zinxhirë.