Kaos në Kuvendin e Shqipërisë, deputetët e opozitës përplasen me gardën

 

Që në hyrje, u përballën me gardën që po i kontrollonte për të ndaluar futjen e flakadanëve në sallë, por kjo nuk i ndaloi t’i fusnin sendet e paligjshme. Tymi i flakadanëve mbuloi sallën ku ligjvënësit pas javës së gjelbër do të duhej të diskutonin problemet e qytetarëve.

 

Protagonisti kryesor i kësaj të enjteje, Flamur Noka, u përjashtua, por seancën 14 minutëshe nuk e la, duke ndezur herë pas here tymuese, ndërsa pas konsultimit me Sali Berishën tentoi t’i vërë flakën edhe karrigeve.

 

Në mesin e kaosit, të paktë kanë qenë deputetët socialistë që mundën të merrnin fjalën.

 

Lindita Nikolla, e cila edhe vetë u shënjestrua nga flakadanët e opozitës, mbylli seancën pas 14 minutash.

 

Pas seancës, Gazment Bardhi, i vetëdijshëm se mund të përjashtohet, tha se Parlamenti ka humbur legjitimitetin.

 

Me të njëjtin skenar, deputetët e opozitës do t’i drejtohen Kuvendit edhe të enjten, kur do të mbahet seanca për të miratuar nen për nen buxhetin e vitit 2024.