Policia zbardh detaje për vrasjen e Vanjës, rrëmbimi është kryer për para, tre të arrestuar, i dyshuari kryesor në arrati

 

“Motivi është interesi financiar me ç’rast njëri nga personat në bashkëpunim dhe dijeni me anëtarë të familjes ka organizuar kryerjen e veprës penale, me qëllim që të merren para nga e ëma e së miturës, që më pas të gjithë të përfshirët do t’i ndanin. Sa i përket personit tjetër në moshë nga Velesi, e cila nuk ka kurrfarë lidhje me të miturën, por për llogari të papastruara me njërin nga të dyshuarit, vetura e tij Citroen është marrë dhe shfrytëzuar gjatë kryerjes së veprës penale, që më pas kjo veturë është gjetur e djegur. Pikërisht me këtë veturë është marrë e mitura në hyrjen e ndërtesës.”, - deklaroi ministri për Punë të Brendshme, Oliver Spasovski. 

 

Policia mbrëmë vonë ka prangosur tre persona. I dyshuari i parë Velibor Manev, ka mohuar ta ketë kryer vrasjen.

 

Tre persona të dyshuar janë arrestuar nga policia. I dyshuari kryesor, i cili thuhet të ketë qëlluar me armë ndaj së ndjerës është arratisur, ndërkohë që edhe babai po merret në pyetje.

 

Nga Ministria e Brendshme sqarojnë se janë në kërkim të të arratisurit, i cili thuhet se ka lëshuar territorin e Maqedonisë me veturë së bashku me avokatin e tij drejt Beogradit dhe më pas në Bullgari. Sipas prokurorisë, të tre të dyshuarit kanë pranuar kryerjen e veprave penale.

 

“Kemi dëshmi për dalje jashtë kontrollit të personave që kanë pranuar veprën. Ata thonë se si pasojë e panikut pasi i gjithë opinioni u angazhua për gjetjen e vajzës dhe njëri prej tyre ka vendosur në atë moment që paratë t’i kërkoj më vonë pasi të kaloj e gjithë situata, andaj edhe në atë moment ka zgjedhur që të likuidojë fëmijën.”, - theksoi prokurori i Prokurorisë Themelore – Shkup, Gavrill Bubevski.

 

E ndjera Vanja Gjorçevska u deklarua e humbur më 27 nëntor, ndërkohë që trupi i pajetë i saj u gjet në rrethinë të Shkupit, ndërkohë që trupi i 74-vjeçarit nga Velesi u gjet në rrethinën e Velesit.