Gaza, Izraeli zgjeron ofensivën tokësore, Hamas: Izraeli nuk po ia del të na shkatërrojë

 

“Ushtria izraelite e vazhdon dhe zgjeron ofensivën tokësore në çdo pjesë të Gazës ku gravitojnë qendrat e Hamasit.”, - deklaroi zëdhënësi i Ushtrisë Izraelite, Daniel Hagari.

 

Por, Hamasi thotë se Izraeli, me gjithë sulmet e shumta, nuk po ia del të mposhtë mbrojtjen në Gaza. 

 

“Izraeli nuk po ia del ta shkatërrojë mbrojtjen tonë, madje edhe nëse i kalon kufijtë jugorë, mbrojtja nuk do të jetë më e vogël se sa në lindje.”,- theksoi përfaqësuesi i Hamasit, Osama Hamdan.

 

 

Autoritetet iraniane paralajmërojnë rrezikun e mundshëm të zgjerimit të konfliktit nëse luftimet në Gaza vazhdojnë.  

     

“Zgjerimi i luftës në rajon absolutisht është i mundur. Janë paralajmëruar të gjitha palët që dëshirojnë ta ndezin luftën, që të ndërpresin me vrasjet para se të jetë shumë vonë.”, - u shpreh ministri i Jashtëm i Iranit, Hosein Amirabdolahian.

 

Një delegacion amerikan po qëndron në Tel Aviv, për të diskutuar rreth ndërprerjes së konfliktit, derisa Katari mbetet i angazhuar për arritjen e paqes mes Izraelit dhe palestinezëve. Po ashtu vazhdojnë edhe sulmet e Hezbollahut dhe kundërpërgjigjet e Izraelit nga Libani. OKB-ja vlerëson se 1,8 milionë banorë të Gazës janë zhvendosur, derisa bombat në jug të Rripit të Gazës bien çdo 10 minuta. 

 

Mëngjesin e së hënës u lëshua urdhër për banorët e Gazës për t’u evakuuar nga rreth 20 zona në Rripin qendror të Gazës. Shqetësimi ndërkombëtar u thellua lidhur me numrin në rritje të viktimave civile. Njoftohet se një spital në qytetin jugor të Khan Jounis është i mbingarkuar me viktima. Ndërkohë mediat palestineze dhe izraelite kanë raportuar edhe për bastisje nga forcat izraelite dhe përleshje në Bregun Perëndimor, ku njoftohet se dy persona janë vrarë.