Përfundon procesi i skriningut me BE-në, Osmani-Mariçiq: Ta shfrytëzojmë momentin

 

“Presim të marrim rekomandim për të vazhduar me konferencën e dytë ndërqeveritare. Secili hap i ardhshëm në procesin aderues të vendit tonë në BE,  si dhe dinamika e negociatave, do të varet vetëm prej nesh, nga miratimi i ndryshimeve kushtetuese. Gjendemi para pikës kryesore të historisë, e cila do ta transformojë shoqërinë maqedonase. Ky është një moment historik për RMV-në, Ballkanin Perëndimor dhe BE-në. Prolongimi apo bllokimi i procesit të BE-së dhe anëtarësimit të RMV-së në BE paraqet rrezik për reformat dhe zhvillimin tonë.”, - deklaroi zëvendëskryeministri për Eurointegrime, Bojan Mariçiq.

 

Sipas ministrit të Jashtëm, Bujar Osmani, përfundimi i procesit të skriningut ka kompletuar dizajnin e shtëpisë evropiane të Maqedonisë së Veriut. Nga Brukseli sërish i bën thirrje Kuvendit që të përmbyll procesin e miratimeve kushtetuese. Sidomos thirrjen e dërgon në adresë të partisë që siç thotë ai, pretendon të udhëheqë me pushtetin e ardhshëm. Ndalet edhe në propozimin për integrim hap pas hapi para se të bëhemi anëtare e plotë e BE-së.

 

“Kam thënë disa herë se nëse Maqedonia e Veriut është 100% e harmonizuar me politikën e jashtme dhe të sigurisë së BE-së, pse të mos thirret në Këshillin për punë të jashtme? Jo me të drejtë vote, por është e udhës simbolike të thuhet se ju jeni 100% të harmonizuar, jeni afër të jeni pjesë e familjes. Pra, më shumë integrim para integrimit të plotë. Të ulesh në tavolinë pa të drejtë vote dhe të kesh qasje në tregun e përbashkët evropian, pra kritere që kërkohen.”, - theksoi ministri i Jashtëm, Bujar Osmani. 

 

Procesi i skriningut filloi më 15 shtator të vitit 2022 dhe u zhvillua sipas dinamikës së paraparë, thonë nga sekretariati për Eurointegrime, si skriningu shpjegues ashtu edhe ai dypalësh, për 33 kapituj të përfshirë në 6 klasterë. Me këtë angazhim  të fundit, procesi i skriningut për RMV-në mbyllet zyrtarisht.