Kongresi tematik, BDI do të promovojë mundësi të barabarta

 

“U shqyrtuan materialet e përgatitura deri më tani, duke u bazuar në programin e BDI-së, i miratuar në kongresin e tretë, gjithashtu materialet tjera strategjike Evropa 20-20, EJL-20-20, si dhe dokumente tjera me rëndësi për Maqedoninë dhe rajonin, nga institucionet e vendit dhe ndërkombëtare. Gjithashtu ne sot diskutuam edhe shqyrtuam materialet dhe sugjerimet që vijnë nga organet partiake, siç janë degët e BDI-së si dhe komunat që drejtohen nga kryetarët nga radhët e BDI-së, me qëllim që të kemi një proces sa më gjithëpërfshirës”- deklaroi kryetari i Sekretariatit për Çështje Ekonomike dhe Financa-BDI, Fatmir Besimi.

 

Organet partiake kanë dalë edhe me kërkesa konkrete të cilat nuk kanë qenë pjesë e programit 2014-2018.

 

“Një ndër kërkesat është shqyrtimi për hapjen e zonës ekonomike në Komunën e Likovës. Unë, bashkërisht me Drejtorinë për Zona Ekonomike, kemi filluar hapat e para dhe të bëjmë analiza. Ajo nuk është e inkorporuar në programin e BDI-së 2014-2018, mirëpo në bashkëpunim, në qeveri mundohemi ta shtyjmë edhe këtë si projekt”- tha anëtari i Sekretariatit për Çështje Ekonomike dhe Financa-BDI, Bekim Neziri.

 

Gjatë panelit ekonomik, i cili do të zhvillohet në kudër të kongresit tematik, Besimi tha se eksperienca dhe ide do të shkëmbejnë edhe përfaqësuesit e komunitetit të biznesit, ndërsa fjalim ka paralajmëruar edhe ish-drejtori i paktit të Stabilitetit në Evropën Juglindore, Erhard Busek.