Shefi i Ushtrisë Shqiptare, Kingji, në Shkup: Bashkëpunimi mes dy ushtrive, në nivel të lartë

 

“Bashkëpunimi ynë dypalësh bilateral i mbrojtjes është në nivelin më të lartë. Të dyja vendet po punojnë në përforcimin e paqes dhe sigurisë në rajon, përmes pjesëmarrjes aktive në nismat rajonale si A5, SEDM, Brigada e Evropës Juglindore, por edhe përmes pjesëmarrjes në misione dhe operacione si, KFOR dhe EUFOR – Altea.”, thuhet në komunikatën e lëshuar nga Ministria e Mbrojtjes. 

 

Shefi i Shtabit të Përgjithshëm i ARM-së, Vasko Gjurçinovski dhe ai i Shqipërisë, Arben Kingji, si përfaqësues i të dy vendeve anëtare të NATO-s, po ashtu shkëmbyen përvojat tyre lidhur me aktivitetet e parashikuara për plotësimin e qëllimeve të caktuara ushtarake, mundësia për avancimin e bashkëpunimit të mëtejshëm me shfrytëzimin e kapaciteteve për trajnim, edukimin ushtarak, si dhe bashkëpunimin në nivel operativ përmes realizimit të ushtrimeve të përbashkëta ushtarake. 

 

Shefi i Shtabit të Përgjithshëm të Ushtrisë Shqiptare, Arben Kingji, u prit edhe nga presidenti i shtetit, Stevo Pendarovski. Ndryshe Ushtria e Maqedonisë së Veriut renditet e 108-ta në listën e ushtrive më të fuqishme në botë, të cilën e ka publikuar portali i specializuar që merret me analiza ushtarake “Global Firepower”. Derisa Ushtria Shqiptare radhitet në vendin e 91, në rajonin e Evropës Juglindore ushtrinë më të fuqishme e ka Greqia, e cila është radhitur në vendin e 30-të, pason Serbia e 58-ta, Bullgaria e 59-ta, Kroacia e 68-ta, apo Sllovenia 86-ta.  Në nivel botëror nga 145 vende ShBA-ja është në vendin e parë, të ndjekur nga Rusia, Kina, India, Britania e Madhe, etj.