Radev: Bullgarët të njihen si komunitet në Kosovë

 

“Së pari bullgarët të njihen si komunitet dhe të kërkohen hapa praktik në bazë të ligjit mbi komunitetet dhe bullgarët të inkuadrohen si zgjidhje politike në Këshillin e komuniteteve pranë presidentit të Republikës. Besoj se ky hap do të jetë shumë i rëndësishëm dhe duhet të falënderojë presidenten Osmani për angazhimin e saj personal dhe për garancitë që dha që gjatë regjistrimit të popullsisë në Kosovë të mbahen parimet e transparencës, objektivitetit, në bazë të standardeve më të larta ndërkombëtare.”, - deklaroi presidenti i Bullgarisë, Rumen Radev.

 

 

Lidhur me kërkesën bullgare, presidentja Osmani tha se Kushtetuta e Kosovës e garanton të drejtën e vet përcaktimit etnik.

 

“Kosova është vend multietnik dhe Kushtetuta e saj përcakton se Kosova përbëhet nga shqiptarët dhe komunitetet e tjera, pra nuk ka kufizim dhe nuk ia parandalon askujt që të tregojë se si çka vetë identifikohet, cilit komunitet i takon, si çka ndihet. Parimi i vet identifikimit është parim i njohur ndërkombëtar dhe Kosova do të zbatojë standardet më të larta ndërkombëtare për mbrojtjen e të gjitha komuniteteve që jetojnë këtu.”, - theksoi presidentja e Kosovës, Vjosa Osmani. 

 

Sa i përket aspektit ligjor, Osmani sqaroi se Kushtetuta dhe ligjet me interes vital, ku bën pjesë edhe ligji për të drejtat e komuniteteve ndryshohen me shumicë të dyfishtë, që do të thotë se përveç votave të deputetëve shqiptar nevojiten edhe votat e minoriteteve përfshirë komunitetin serb, por këta të fundit aktualisht bojkotojnë punën e Kuvendit. Presidentja Osmani në takimin me presidentin bullgar, Radev, ka kërkuar përkrahjen e Bullgarisë për anëtarësimin e Kosovës në NATO dhe BE, pasi siç vlerësoi ajo, vetëm anëtarësimi i të gjitha shteteve të Ballkanit në NATO mund të sjellë paqe në rajon.