KE në mundje U23: Eliminohen shqiptarët, Zubairov në luftë për medaljen e bronztë

Mundësit shqiptar të Maqedonisë, nuk kishin fat gjatë ditës së sotme, në kampionatin evropian deri në moshën 23 vjeçe, me ç`rast Jasin Rexhallari dhe Behar Mahmuti u eliminuan nga kundërshtarët e tyre të parë.

Shpresa jonë më e madhe për të ardhur deri te medalja, mundësi I Lirisë, Jasin Rexhallari, në kategorinë deri në 61 kg, edhe pse kishte paraqitje dinjitoze ndaj bullgarit Stefan Ivanov, në fund u mposht me 19-8.

Ai nuk u fitua vetëm nga kundërshtari, por edhe nga gjyqtarët e kësaj lufte, ndërsa momenti kyq ishte në raundin e dytë, kur mundësi ynë duhej ta fitoj takimin me dush, por arbitrat heshtën dhe kështu ia dhuruan fitoren kundërshtarit.

Bullgari, në raundin e ardhshëm nuk e kishte ndihmën e referëve dhe me dush u mposht nga gjeorgjiani Shamatava, me ç`rast Rexhallari nuk e fitoj mundësinë të garoj në repasazh, duke I mbyllur garat si I nënti në kategorinë e tij.

Nga ana tjetër, mundësi të artë për arritje të madhe kishte Behar Mahmuti, por ai nuk e shfrytëzoi mundësinë në kategorinë deri në 70 kg. I plasuar pa lufta në çerekfinale, Mahmuti u takua me Zsombor Gulyas, nga I cili humbi me 2-1 në pikë, që më pas, hungarezi në gjysëmfinale të mposhtet nga ukrainasi Ivan Kusyak, për në fund plasman në pozitën e 11-të të Mahmutit.

Nga përfaqësuesit e Maqedonisë, paraqitjen më të mirë e kishte maqedonasi I natyralizuar, Halil Zubairov, në kategorinë deri në 86 kg. Mundësi me prejardhje ruse, në luftat finale që nisin në orën 19.00, do të luftojë për medaljen e bronztë, ndaj spanjollit Daniel Rama.

Gjatë seancës së mëngjesit, Zubairov, në 1/8 e finales eliminoi bullgarin Mehmed Gazi, që më pas, në çerekfinale të humb me 8-6 nga Aliksandr Hushtyn, edhe pse kishte epërsi prej 6-0. Bjellorusi, u plasua në finale dhe I mundësoi Zubairovit të luftoj në repasazh, ndaj ukrainasit Ilia Archaia, të cilin e mundi me 12-4.

Duhet cekur që në këtë kategori, sot u paraqit edhe mundësi I vetëm kosovar, Edon Shala, I cili kishte nderin si I pari të përfaqësoj vendin e tij, por humbi që në raundin e parë nga Irakli Mstituri, duke humbur me 4-0. 

MUSTAFA ADEMI