Nata e vitit të ri kaloi e qetë, Spasovski: Gjendja e sigurisë, e favorshme

 

“Kemi gjithsej 12 vepra penale në mbarë shtetin, pjesa më e madhe tregëti me narkotikë dhe një kërcënim të sigurisë. Kemi të regjistruar edhe 20 shkelje të ligjit për rend dhe qetësi publike, 2 shkelje të sigurisë në trafik, 8 aksidente me dëme materiale. Ky është numri më i ulët i aksidenteve që kanë ndodhur deri më tani. Gjithashtu ka pasur edhe 11 ankesa qytetarësh. Nëse shohim gjëndjen në total janë regjistruar nga 1 ose 2 raste nëpër  qytete të ndryshme, ndërkaq në Shkup dhe Tetovë kemi numrin më të madh të rasteve, por në përputhje me numrin e qytetarëve mund të themi se kishim një natë stabile.”, tha Oliver Spasovski, ministër për punë të brendshme.

 

Me shfrytëzimin e limituar të mjeteve piroteknike pas konfiskimit të konsiderueshëm vitin që po lëmë pas, ministri Spasovski tha se nuk janë raportuar incidente nga përdorimi I tyre.

 

“Këtë vit nuk kemi asnjë person të lënduar nga mjetet piroteknike, ndërkaq intensiteti i punës së policisë ndikoi që të kemi konfiskimin e mbi 100 mijë copë mjete piroteknike gjatë vitit 2023.”, tha Spasovski.

 

Gjatë vizitës në stacionin policor në Gjorçe Petrov, Spasovski zbuloi edhe disa të dhëna nga aktivitetet e policisë gjatë vitit të kaluar për një qytet të sigurt, sikurse  arrestimin e 149 personave pas hetimit të identitetit të mbi 10 mijë e 800 personave, kontroll të më shumë se 9 mijë personave dhe mbi 5 mijë e 200 veturave. Kontrollet janë realizuar pas kërcënimit të sigurisë publike, prodhim antiligjor dhe lëshim në përdorim të narkotikëve, falsifikim të dokumenteve, parave dhe vjedhjeve të rënda.