Rusi, Ukraina ka kryer sulm me dron në Belgorod

Rusia ka akuzuar Ukrainën se ka lëshuar 12 raketa dhe disa dronë në rajonin jugor rus të Belgorodit.

Sipas autoriteteve ruse, sulmi ukrainas ndodhi në orët e para të ditës së sotme. Guvernatori rajonal, Vaçeslav Gladkov, tha se situata “vazhdon të jetë e tensionuar” në Belgorod, ku Rusia tha se 25 civilë, përfshirë pesë fëmijë, u vranë gjatë sulmeve ukrainase më 30 dhjetor 2023.

Sa i përket sulmit të fundit, autoritetet ruse nuk kanë treguar nëse ka viktima. Galdokov tha se gjatë ditës do të vlerësojnë dëmin e shkaktuar.

Përshkallëzimi i sulmeve të Ukrainës në Belgorod vjen pasi Rusia ka kryer disa prej sulmeve më masive në Ukrainë që kur Moska nisi luftën e paprovokuar kundër Ukrainës rreth dy vite më parë.