Shkupi, ndër qytetet më të ndotur në botë, komunat deklarohen të pafuqishme

 

“Së pari ne si komunë nuk jemi duke shfrytëzuar vetura të cilat janë në derivate, por kemi 4 vetura me energji elektrike dhe një motoçikletë elektronike. Po ashtu kemi investuar shumë në panelet fotovoltaike, kemi 140 mijë metër hapësirë gjelbëruese. Gjithçka që është nën kompetencat tona, ato masa i kemi ndërmarrë, këtë ndotje duhet ta luftojmë përmes ndonjë makro-projekti të madh, ku do të përfshihen të gjitha komunat, sepse veç e veç, asnjë komunë nuk do të mund ta luftojë këtë dukuri. Duhet bartës i këtij projekti të jetë Qeveria e vendit dhe jo ndonjëra prej komunave.”, - deklaroi kryetari i komunës së Çairit, Visar Ganiu. 

 

Ministria e Ambientit Jetësor dhe Planifikimit Hapësinor konsideron se 45 për qind të ndotjes e shkaktojnë amvisëritë, të cilat gjatë kohës së dimrit, shfrytëzojnë preparate të ndryshme për ngrohje. Kryetari i Komunës së Qendrës, Goran Gerasimov, thotë se problemi është i të gjithëve dhe si i tillë duhet të tejkalohet.

 

“Pjesa më e madhe apo rreth 45 për qind e ndotësve janë amvisëritë, por fati i mirë në komunën tonë është se shumica e amvisërive ngrohen ose me energji elektrike ose janë të lidhur në ngrohtoren qendrore. Por kemi disa vendbanime të cilat ngrohen me përdorimin e drunjve, por në bashkëpunim me Inspektoratin e Mjedisit Hapësinor keni konstatuar se kontrollet duhet të shtohen me qëllim që këto vendbanime të mos djegin goma dhe plastika.”, - theksoi kryetari i komunës së Qendrës, Goran Gerasimov. 

 

Edhe kryetari i komunës së Kisela Vodës, Orce Gjorgjievski, është i mendimit se duhet të ndërtohet një strategji nacionale, ku bartësit duhet të jenë pushteti qendror dhe Qyteti i Shkupit.   

 

“Kemi ndërmarrë disa masa për banorët e komunës tonë, por kanë ndihmuar edhe subvencionet e mënyrës së ngrohjes. Planin e Efikasitetit Energjetik e kemi realizuar në të gjitha objektet publike, të njëjtën po e paraqesim edhe tek amvisëritë, por për problemin e ndotjes duhet të ndërtohet një strategji nacionale, ku Ministria e Ambientit është si më e thirrur, pastaj Qyteti i Shkupit. Në këtë drejtim po them se përveç demagogjisë politike të cilën e përdor pushteti qendror, asgjë konkrete nuk kemi.”, - u shpreh kryetari i komunës së Kisella Vodës, Orce Gjorgjievski.

 

Komunat në kuadër të Qytetit të Shkupit, po ashtu janë dakorduar që të dërgohet një kërkesë zyrtare deri tek Qyteti i Shkupit, ku është kërkuar që të realizohet një takim me të gjithë palët që i takon problemi i ndotjes dhe bashkërisht të marrin vendime se si të veprohet në vazhdim. Ndërsa ditë më parë ministrja e Mjedisit dhe Planifikimit Hapësinor, Kaja Shukova, tha se zëvendësimi i sistemeve të ngrohjes me ato ekologjike është një masë afatgjatë, por edhe një proces afatgjatë.