Futboll
Kozniku largohet nga Shkëndija
27.03.2015 15:03
Trajneri i deritashëm i Shkëndijës, Ardian Kozniku, nuk do të jetë më në krye të skuadrës tetovare...
Bashkëpunimi ndërmjet skuadrës së Shkëndijës dhe trajnerit të mirënjohur kosovar, Ardian Kozniku, ka marrë fund pas xhiros 21 të kampionatit maqedon.
Drejtuesit e klubit tetovar kanë arritur marrëveshje të dyanshme me Koznikun që ta ndërprejnë kontratën, pas rezultateve jo të kënaqshme të ekipit kuqezi.
Shkëndija së fundi u mposht me rezultat minimal 1-0 nga rivali lokal, Teteks, skuadër kjo që gjendet në pozitën e fundit të radhitjes tabelare, gjë që doli të jetë e papranueshme për drejtuesit e klubit tetovar.
Në vend të trajnerit gjakovar, në krye të skuadrës është emërtuar trajneri Jeton Beqiri, i cili deri më tani ka qenë ndihmësi i Koznikut.
Kozniku gjatë karrierës së tij si futbollist ka qenë reprezentues edhe i përfaqësueses së Kroacisë, ndërsa te Shkëndija e ka përjetuar përvojën e parë si trajner i një skuadre.
Shkëndija momentalisht gjendet në pozitën e tretë të radhitjes tabelare pas Vardarit dhe Rabotniçkit, me gjithsej 37 pikë të tubuara.