Për studentët e vitit të tretë dhe të katërt, qeveria ndan 12 mijë vauçerë për tabletë

Prej sot, të gjitha  kompanitë të cilat dëshirojnë të marrin pjesë në këtë projekt duhet t’i dorëzojnë ofertat e tyre promovuese në Ministrinë e Shoqërisë Informatike.

 

Këtë vit do të shpërndahen 12 mijë vauçerë me shumë prej 8 mijë denarëve. Ndërsa prej ditës së nesërme të gjithë studentët do të mund të aplikojnë për të marrë tablet.

 

“Ne si qeveri kemi konstatuar se vauçerët që u japim studentëve prej 8 mijë denarëve është ofertë më e mirë se sa ajo që ishte kërkuar vitin e kaluar. Me këtë projekt qeveritar mundemi atyre t’u ofrojmë 12 mijë vauçerë, kjo do të thotë se 3/4 e tregut që e pati biznesi privat vitin e kaluar, ne do ta realizojmë për vetëm 2 ose 3 muaj”- deklaroi ministri i Shoqërisë Informatike, Ivo Ivanovski.

 

“Studentët do të kenë mundësi më të mëdha për përzgjedhje. Tanimë nuk duhet të përzgjedhin vetëm tabletët e kategorisë më të thjeshtë dhe më të lirë, por do të kenë mundësi të marrin tableta të klasit të lartë, sepse vauçerët  prej 8 mijë denarëve i përshijnë të gjitha kategoritë e tabletëve duke filluar prej ASUS, REJSER, LENOVO dhe SAMSUNG etj”- tha Dejan Kimovski nga “Set kompjuter”.

 

Kushti i vetëm për marrjen e këtyre vauçerëve është që studentët të kenë regjistruar vitin e tretë ose të katërt në universitet dhe të mos kenë të ardhura bruto prej mbi 32 mijë denarëve në familjen e tyre.

 

Për realizimin e këtij projekti qeveria ndau rreth 96 milion denarë, ndërsa, sipas informatave, vauçerët e studentëve do të shpërndahen në qershor të këtij viti.