Kurti: Pushteti i Vuçiqit po ndjek rrugën e Putinit

 

“Javën e kaluar dy qytetarë të RKS-së, Hasan dhe Xhavit Dakaj, u ndaluan dhe arrestuan në kufi me Serbinë. Hasan Dakaj edhe sot vazhdon të mbahet atje padrejtësisht dhe në mënyrë arbitrare. Kjo nuk është hera e parë dhe nuk paraqet rast të izoluar. Kjo është një sjellje e qëllimshme dashakeqe e Serbisë që bie ndesh me Konventat ndërkombëtare për të drejtat e njeriut. Serbia vazhdon të mbajë në paraburgim edhe dy qytetarë të tjerë të RKS-së, Petrit Dula dhe Nezir Mehmeti, të dy të mbajtur nga autoritetet serbe për gjoja kryerjen e krimeve kundër popullatës civile gjatë luftës në Kosovë.”, - deklaroi kryeministri i Kosovës, Albin Kurti.

 

Kurti njëherit ka akuzuar Serbinë se po e ndjekë rrugën e metodave të presidentit rus, Vladimir Putin, me përndjekjen edhe të politikanëve serb që kanë guximin të pranojnë gjenocidin e Serbisë në Kosovë.

 

“Kështu është rasti me liderin opozitar serb, Nikolla Sandulloviq, kryetar i partisë republikane atje për të cilin krahas torturave fizike, shteti serb zgjedh të ngritë aktakuzë për nxitje të urrejtjes kombëtare, sepse ai u përkul para varrit të 7-vjeçares, Blerina Jashari, e vrarë nga forcat serbe në Prekaz në marsin e vitit 1998.”, - theksoi kryeministri i Kosovës, Albin Kurti.

 

Sipas Kurtit me frikë dhe dhunë pushteti autokratik i Aleksandar Vuçiqit po tenton të mposhtë opozitarizmin dhe të gjithë zërat që i kundërvihen atij pushteti.