Në Hagë nisi seanca dëgjimore, Izraeli përballet me akuzat për gjenocid në Gaza

 

“Asnjë sulm i armatosur në territorin shtetëror, sado i rëndë qoftë, qoftë edhe një sulm me krime, nuk mund të japë justifikim. Përgjigja e Izraelit ndaj sulmeve të 7 tetorit kaloi kufirin dhe shkeli parimet e konventës.”, - deklaroi ministri i Drejtësisë së Afrikës Jugore, Ronalld Lamola. 

 

Përpara Pallatit të Drejtësisë, protesta propalestineze dhe proizraelite. Administrata e Bajdenit përsëriti kundërshtimin e saj ndaj padisë, duke theksuar se akuzat janë të pabaza. Ndërkohë që përpjekjet diplomatike për Gazën e pasluftës vazhdojnë në Lindjen e Mesme. Blinken, për vizitë në Egjipt. 

 

“Është e qartë se vendet e rajonit janë të shqetësuar, para së gjithash, për të parandaluar përhapjen e konfliktit, por edhe për të formuar një të ardhme më të mirë për rajonin në tërësi, veçanërisht për izraelitët dhe palestinezët.”, - theksoi sekretari amerikan i shtetit, Antoni Blinken. 

 

Ne nuk kemi ndërmend të pushtojmë përgjithmonë Gazën apo të zhvendosim popullsinë civile, pohoi kryeministri, Netanjahu.

 

“Ne po luftojmë terroristët e Hamasit, jo popullsinë palestineze. Dhe ne e bëjmë atë në përputhje të plotë me të drejtën ndërkombëtare. Mbrojtja izraelite po bën gjithçka për të minimizuar viktimat civile. Qëllimi ynë është të çlirojmë Gazën nga terroristët e Hamasit dhe të çlirojmë pengjet tona. Pasi të arrihet kjo, Gaza mund të çmilitarizohet dhe deradikalizohet.”, - u shpreh kryeministri i Izraelit, Benjamin Netanjahu. 

 

Izraeli zbuloi tunele të reja të Hamasit në Gazën qendrore dhe njoftoi operacione të reja në zonë. Nga ana tjetër, sulmet në jug po vazhdojnë dhe numri i viktimave po rritet. OBSh-ja anuloi një mision ndihme në Rripin e Gazës për shkak të shqetësimeve të sigurisë dhe i bëri thirrje Izraelit që të miratojë shpërndarjen.