ShBA dhe Britania, sulme kundër rebelëve Huthi në Jemen

 

“Sulmi i pakuptimtë, i kundërligjshëm dhe kompleks i së martës nga ana e Huthëve në pjesën jugore të Detit të Kuq edhe një herë e dëshmoi rëndësinë e operacionit. Jemi falënderues ndaj më shumë se 20 kombeve, të cilët u bashkëngjitën në operacionin “Prosperitet Gardian”, për mbrojtjen e lundrimit detar dhe sigurinë në Detin e Kuq, përfshirë Singaporin, i cili këtë javë njoftoi se do t’i bashkëngjitet këtij koalicioni ndërkombëtar.”, - deklaroi zëdhënësi i Pentagonit, Pet Rajder.

 

Sulmet e përbashkëta të ShBA-së dhe Britanisë u kryen me mbështetjen e Australisë, Kanadasë, Holandës dhe Bahrejnit.        

                                    

"Australia qëndron për një rend të bazuar në rregulla. Australia duhet të mbrojë lirinë e lundrimit. Ne jemi një komb tregtar ishullor, shumica e prosperitetit tonë bazohet në linjat detare të komunikimit, lirinë e tregtisë në det të hapur.”, - theksoi ministri i Mbrojtjes i Australisë, Riçard Marles.

 

Udhëheqësi i Huthit kërcënoi se Uashingtoni dhe Londra së shpejti do të kuptojnë se sulmet ndaj Jemenit janë marrëzia më e madhe në historinë e tyre. Dënimi i sulmeve erdhi edhe nga Irani dhe Hezbollahu libanez. Arabia Saudite bëri thirrje për përmbajtje, Rusia kërkoi një seancë urgjente të Këshillit të Sigurimit të OKB-së. 

 

“Ne nuk do të hezitojmë të bëjmë gjithçka që mundemi. Çdo agresion amerikan nuk do të mbetet pa përgjigje. Ne i këshillojmë të gjitha vendet aziatike dhe evropiane, në lindje, në perëndim, të mos ndërhyjnë me Amerikën, le të vëzhgojnë dhe fakti që Britania u përfshi nuk ka asnjë problem.", - u shpreh lideri suprem i rebelëve Huthi, Abdel Malek al-Huthi.

 

Ky është sulmi i parë ndaj Huthit që kur grupi bombardoi anije mallrash në Detin e Kuq me dronë dhe raketa në nëntor. Dy ditë më parë, Këshilli i Sigurimit i OKB-së miratoi një rezolutë që u kërkon Huthëve të Jemenit të ndalojnë sulmet ndaj anijeve komerciale dhe tregtare.