Formimi i Qeverisë teknike, Kovaçevski konfirmon dorëheqjen të enjten: Të gjitha partitë të japin mbështetje

 

“Konsideroj se tani të gjitha partitë politike në përputhje me ligjin do të duhet të mbështesin këtë qeveri, pasi që bëhet fjalë për mandatar, i cili ka qenë ministër në kohën e qeverisjes së VMRO – DPMNE-së. Unë i shoh një pjesë të përfaqësuesve të VMRO-së tani i drejtohen me epitete të caktuara, të cilat nuk ishin të njëjta në kohën kur ishte kandidati i tyre për ministër të Mbrojtjes dhe atëherë u janë drejtuar me zotëri Xhaferi.”, - deklaroi kryeministri, Dimitar Kovaçevski. 

 

 

Paralelisht me kryeministrin, dorëheqjen do ta deponojë edhe kryeparlamentari, Talat Xhaferi. Nga kabineti i Xhaferit edhe pse kanë njoftuar se planifikimi për mbajtjen e seancave mbetet i njëjtë, megjithatë deklarimet politike kundrejt votimit më 28 janar kanë turbulluar ujërat se mund të ketë edhe ndryshime në itinerarin e seancave. Kryeparlamentari Xhaferi, për nesër thërret koordinim.

 

“Nesër kryetari i Parlamentit do të ketë një koordinim ad hok, ku do të vërtetohen datat e sakta për mbajtjen e seancave.”, njoftojnë nga kabineti i kryeparlamentarit, Talat Xhaferi.

 

Në koordinim tek Xhaferi, tanimë një kohë të gjatë nuk marrin pjesë përfaqësues të VMRO-së dhe tani edhe përfaqësues të opozitës shqiptare, pas përplasjeve me pushtetin për të zënë vendin vakant në KShZ. Të dyzuar në qëndrim kundër Talat Xhaferit janë edhe nga Lidhja Demokratike e Pavle Trajanov.