Mexhiti: Radiologjia, një prej pikave më problematike

 

 

“Do ta centralizojmë tërë radiologjinë, e cila do të jetë në Klinikën e Radiologjisë, me çka nuk do të ketë nevojë në tërë shtetin të ketë radiologë, do të ketë vetëm personel teknik për realizimin e fotografimit dhe më pas radiologët onlajn do të mund ta lexojnë. Por, ky është proces që zgjatë dhe ne jemi të kujdesshëm që kjo të jetë efikase.”, - deklaroi ministri i Shëndetësisë, Fatmir Mexhiti.

 

 

Sipas Mexhitit, në Klinikat Universitare të kompleksit “Nënë Tereza” në Shkup, përfshirë Klinikën e Radiologjisë, ka mungesë mjekësh dhe kuadrit tjetër të nevojshëm, prandaj ai tha se është angazhuar personalisht për 1,117 punësimet e paralajmëruara në shëndetësi, për të cilat tha se të gjitha përgatitjet janë në përfundim e sipër.

 

Këtë ministri Mexhiti e deklaroi në Spitalin e përgjithshëm në Veles, që u furnizua me aparaturë të re mjekësore.

 

“Bëhet fjalë për aparatin e ri për anestezion të siguruar nga Ministria e Shëndetësisë në vlerë prej 4 milionë denarësh. Kjo aparaturë e vendosur tashmë në sallën e operacionit nevojitet për funksionim më të mirë të repartit të anestezisë. Gjithashtu me mjete nga ministria në vlerë prej 3 milionë e gjysmë denarë kemi blerë edhe një respirator të ri.”, - theksoi ministri i Shëndetësisë, Fatmir Mexhiti.

 

Ministri Mexhiti tha se buxheti për furnizim me pajisje të reja është dyfishuar nga 2,6 milionë në 5 milionë euro, ndërsa janë siguruar pajisje të reja bashkëkohore në më shumë se 15 institucione shëndetësore.