Punonjësit e FSSh-së kërcënojnë me grevë, puna ndërpritet nëse ulen pagat e tyre

 

“Nëse Bordi Drejtues i Fondit të Sigurimeve Shëndetësore merr vendim për uljen e pagave të punonjësve për 21%, ata do të hyjnë në grevë. Në sportele do të punojë vetëm një person, i cili do të marrë vetëm dokumentacion dhe nuk do të ketë pagesa të kapitacionit për mjekët amë, për medikamente në  barnatore, për paga në shëndetësinë  publike, si dhe shërbime të tjera.”, - deklaroi kryetari i Organizatës Sindikale të Fondit për Sigurim Shëndetësor, Branko Axhigogov.  

 

Sindikata e Punëtorëve Administrativë, Organeve Gjyqësore dhe Shoqatave të Qytetarëve drejton gishtin nga Ministria e Financave, e cila e ka porositur Bordin Drejtues të Fondit që të marrë një vendim që do të ulë pagat e punonjësve për 21%. Ata thonë se ky gjest ishte jashtëzakonisht nënçmues për ta.

 

“Buxheti i Fondit për Sigurim Shëndetësor është i ndarë nga buxheti qendror, mjetet për paga nuk janë të parapara nga Buxheti Qendror, por nga buxheti i fondit dhe asnjëherë nuk ka pasur një problem të tillë dhe një ndërhyrje të tillë në punën e Fondit për sigurim shëndetësor nga ana e Qeverisë  dhe Ministrisë  së  Financave.”, - theksoi kryetari i Spogj-it, Tërpe Deanoski. 

 

Vendimi prek 831 punonjës në Fondin e Shëndetësisë dhe nëse do të ketë ulje pagash, sipas Sindikatave, 25% do të marrin pagë në vlerë  nën pagën minimale dhe 25% sa paga minimale. Buxheti i Fondit për Shëndetësi është mbi 46 miliardë denarë, prej të cilave 1,19%  ndahen  për paga.