BE ndihmon Ukrainën me 50 miliardë euro, Orban dakordohet për ndihmën

 

“E mirëpresim marrëveshjen për të ofruar ndihmë financiare afatgjate për Ukrainën. Ky është një lajm i mirë. Ukraina është prioriteti ynë. Kjo do të na sigurojë besueshmërinë, legjitimitetin dhe parashikueshmërinë që pritet nga ne, sepse siguria e Ukrainës nënkupton edhe  sigurinë  evropiane”, u shpreh kryetarja e parlamentit evropian Roberta Mekola. 

 

“Është shumë e rëndësishme që vendimi u mor unanimisht nga të gjithë  27 liderët.  Kjo është edhe një tjetër tregues i unitetit dhe mbështetjes suaj të fortë për Ukrainën. Në samitin e fundit u vu në pikëpyetje besueshmëria e Bashkimit Evropian por tani e forcuam atë së bashku”, theksoi presidenti i Ukrainës, Volodimir Zelenski.

 

Pakoja financiare  prej 50 miliardë eurosh do të ndihmojë Ukrainën të paguajë për pensionet, pagat dhe shpenzimet  tjera gjatë viteve të ardhshme. Kievi pret këstin e parë të paketës në mars.

 

Përderisa liderët evropianë në samitin e jashtzakonshëm  diskutuan rishikimin e kornizës financiare të BE –së  për periudhën 2021-2027, fermerët evropianë bllokuan rrugët dhe sheshet përreth institucioneve evropiane. Fermerët janë të pakënaqur nga shpenzimet e rritura  dhe byrokracia.