Konjufca: Dinari duhej të ndërpritej që në vitin 1999

 

“Dinari dhe shfrytëzimi i tij është dashur që të ndërpritet kur Serbia është larguar nga Kosova pas luftës çlirimtare të UÇK-së dhe NATO-s në qershor të vitit 1999. Por, prej viti 2001 askush nuk ka dyshim që edhe me vetë rregullimin institucional të RKS-së, edhe me rregulloret dhe ligjet tona dinari ka qenë gjithmonë ilegal, tjetër gjë që pastaj në forma dhe mënyra të ndryshme është shfrytëzuar edhe është përdorur prej institucioneve paralele që i ka pasur Serbia këtu në RKS-së dhe që i ka keqpërdorë ato. Kjo që nga ndodh me rregulloren e BQK-së është vetëm zbatim i një principi, i cili është qysh moti në RKS. Por, kjo është konsideruar një çështje, e cila nga ana e Qeverisë me siguri dhe nga ana e BQK-së një çështje, e cila nuk do të shkaktojë probleme  dhe turbulenca.”, - deklaroi kryetari i Kuvendit të Kosovës, Glauk Konjufca.

 

Konjufca njëherit nuk e beson se do ketë sanksione ndërkombëtare për Kosovën për këtë çështje. Ndërkohë Komisioni Evropian u është bashkuar zërave kritikë ndaj Kosovës, pas hyrjes në fuqi më 1 shkurt të rregullores së Bankës Qendrore të Kosovës, që parasheh përdorimin e euros për pagesat me para të gatshme, duke ndaluar përdorimin e dinarit serb, që përdoret nga serbët të cilët jetojnë në Kosovë. BE-ja dhe ShBA-ja kanë kërkuar shtyrjen e vendimit, pas reagimit të Listës Serbe dhe autoriteteve në Beograd.