Maqedonia, Shqipëria dhe Kosova sonte mësojnë kundërshtarët

Në kuadër të kongresit të UEFA-s, sot në Paris nga ora 18:00 do të hedhet shorti për ndeshjet e Ligës së Kombeve që nis në shtator të këtij viti.

Maqedonia dhe Kosova janë në përbërje të Ligës “C”.  Përfaqësuesja e vendit është në vazon e tretë,  ku janë edhe Sllovakia, Irlanda Veriore dhe Qipro. Ndërsa Kosova ndodhet në vazon e dytë, me Azerbajxhanin, Bullgarinë dhe Ishujt Faroe. Kombëtarja shqiptare do  të luajë në Ligën “B”. Asnjëra kombëatre nuk mund të përballet me skuadrat që i ka në një vazo.

Ndryshimi në krahasim me edicionin e kaluar është se dy kombëtaret e para e jo vetëm një do të kalojnë në ¼ e finales me dy ndeshje.  Paraqitja e kombëtarave në Ligën e kombeve, është e lidhur me eliminatoret evropiane për botërorin e ardhshëm.

Në eliminatoret plotësuese  të UEFA-së, për botërorin e 2026-tës, do të kualifikohen 12 kombëtaret e dyta  nga eliminatoret si dhe katër kombëtaret më të mira prej Ligës së Kombeve, e që nuk kanë siguruar kualifikimin përmes eliminatoreve.