Anija kozmike amerikane “Odisej” ulet me sukses në polin jugor të Hënës

“Ne mund të konfirmojmë, pa dyshim, se pajisjet tona janë në sipërfaqen e Hënës. Urime ekipi “AJ-EM".”, - theksoi drejtori i Misionit Fluturues, Tim Krejn. 

 

Pas gjysmë shekulli, Shtetet e Bashkuara janë kthyer në satelitin e Tokës, një premtim historik për fluturimet e ardhshme komerciale.

 

“Për herë të parë pas gjysmë shekulli, Shtetet e Bashkuara u kthyen në Hënë. Sot, për herë të parë në historinë njerëzore, një kompani komerciale amerikane filloi dhe udhëhoqi udhëtimin atje. Sot është një ditë që pasqyron fuqinë dhe premtimin e partneriteteve komerciale të NASA-s. Urime për të gjithë të përfshirë në këtë kërkim të madh dhe të guximshëm.”, - deklaroi administratori i NASA-s, Bill Nelson. 

 

Inxhinierët pranojnë se misioni ishte një sfidë e vështirë. “Odisej” synon të vlerësojë mjedisin në polin jugor të satelitit të Tokës, një zonë me depozita ujore të ngrira me interes të veçantë për misionet e ardhshme të NASA-s, Artemis, të planifikuara për vitin 2026. Pajisja mbart disa instrumente shkencore të NASA-s dhe teknologji të reja. “Odisej” u lansua shtatë ditë më parë nga Qendra Hapësinore Kenedi në majë të raketës Falcon 9, e ndërtuar nga kompania me bazë në Kaliforni SpaceX, në pronësi të Elon Musk. Hera e fundit që një pajisje amerikane u fut butësisht në tokën hënore ishte misioni “Apollo” në vitin 1972.