Raporti i GREKO-s, përparim në implementimin e rekomandimeve

 

Edhe pse ministri është anëtar sipas detyrës zyrtare dhe nuk ka të drejtë vote, GREKO kërkon që ai të largohet plotësisht nga Këshilli, për të cilin duhet të ndryshohet Kushtetuta. GREKO vlerëson se kjo ende i jep hapësirë ministrit të Drejtësisë të ndikojë politikisht gjatë vendimmarrjes në këshill.

 

GREKO shpreh keqardhjen që nuk ka përmirësim në sistemin e sanksionimit të deputetëve të parashikuar nga Ligji për Parandalimin e Korrupsionit dhe Konfliktit të Interesit. Nuk janë të kënaqur me shqyrtimin sipërfaqësor të gjendjes pronësore të deputetëve, gjyqtarëve dhe prokurorëve të raportuar në pyetësorët.

 

“Pjesa më e madhe e shkeljeve janë konstatuar vetëm mbi baza thjesht procedurale dhe jo me një kontroll të thelluar. Informacionet për një kontroll më të thelluar të deklaratave të interesave është dhënë vetëm për një pjesë të deputetëve. Asnjë deputet nuk është sanksionuar për mospërputhje të gjendjes pronësore me listën e anketimit.”, thuhet në raport.

 

Ndërkohë, theksohet se sanksionet dhe masat disiplinore për gjykatësit e pandërgjegjshëm nga viti 2019 janë të precizuara në ligj, por që edhe Komisioni Shtetëror për Parandalimin e Korrupsionit ka hetuar gjykatësit sa i përket gjendjes pronësore. Edhe më tej mbeten problem prokurorët dhe dënimet për punë jo të ndërgjegjshme dhe joprofesionale, që jo vetëm se janë të rralla, por edhe me ligj po kufizohen. GREKO rekomandoi që të zhvillohen rregulla dhe standarde për prokurorët në lidhje me pranimin e dhuratave.