Zgjedhjet 2024, Fronti Europian vazhdoi fushatën në Strugë

“Fronti Europian”,  ka vazhduar me aktivitetet parazgjedhore në qytetin e Strugës,  ku lideri i BDI-së,  Ali Ahmeti,  ka theksuar se në zgjedhje dilet me platformë dhe qytetarët votojnë mbi platformën e ofruar para tyre nga subjektet politike.

“Fronti europian”,  ka dalur në zgjedhje me platformën “Po Evropës, jo Rusisë”, ndërsa opozita tërë fushatën e përqendroi te rrënimi i BDI-së,  tha më tej, Ahmeti, sipas të cilit, një fushatë të tillë, e bënte edhe VMRO-DPMNE.

Sipas tij, ata merren me BDI-në sepse ua ka zënë diellin, por qytetarët janë ata që vendosin për fatin e Bashkimit Demokratik për Integrim. Ahmeti,  më tej theksoi se rrethi i parë i zgjedhjeve presidenciale,  e vërtetoi se BDI nuk rrënohet.

Në historinë e njerëzimit as një Front nuk ka humbur, prandaj nuk do të humbë as “Fronti Europian”,  i përbërë prej nëntë partive, tha Ahmeti, sipas të cilit,  më 24 prill,  ky Front,  u përball me opozitën shqiptare “Vlen”, ndërsa më 8 maj,  do të përballet me VMRO-DPMNE-në. Misioni ynë është integrimi i vendit në BE,  thekson Ahmeti.

“Tani misioni ynë vazhdon, ne duam që shteti ynë të jetë anëtarë i plotfuqishëm i BE-së,  sepse alternativë tjetër nuk kemi, shteti ynë ka nevojë për më shumë paqë, për më shumë stabilitet, për më shumë siguri, a se shohim se jo larg nesh zhvillohen luftime të mëdha.” – tha Kryetari i BDI-së, Ali Ahmeti.  

Pjesë e “Frontit Europian”,  janë edhe bashkësitë më të vogla e më të diskriminuara në vend,  ka deklaruar kandidati për deputet në njësinë e 5-të zgjedhore,  Musa Xhaferi, gjatë një aktiviteti parazgjedhorë në Kërçovë. Xhaferi tha,  se legjitimiteti për tu bërë pjesë e qeverisë,  u takon qytetarëve,  e jo kryetarëve të partive politike, siç pretendojnë liderët e koalicionit opozitar,  “Vlen”.

“Mundohen të lidhen edhe me kundërshtarët e Frontit,  që të mburren se ata do të jenë,  siç e quajnë veten,  të përfshihen pjesë e qeverisë , legjitimitetin e kanë votuesit, legjitimitetin për të qeverisur,  për të menaxhuar mandatin e  ardhshëm,  e keni ju.” – deklaroi Musa Xhaferi, Kanddiat për deputet në njësinë e 5-të.

Liderët e opozitës shqiptare sipas Xhaferit, po mundohen të bëjnë një luftë psikologjike,  prandaj kjo nuk duhet t’i preokupojë votuesit dhe përkrahësit e “Frontit Europian”.

Sipas tij,  ata kanë të vetmen dëshirë,  t’a rrëzojnë nga pushteti liderin e BDI-së, Ali Ahmeti, por këto dëshira më 8 Maj në mbrëmje,  do të shkojnë në histori,  tha Xhaferi. Ai tha se,  sa i përket zonës zgjedhore numër pesë,  Fronti,  do të fitojë bindshëm, me synimin për të fituar 4 deri në 5 deputet.

Në Prespë, Manastir, Krushevë, Dollnen, Dibër, Zhupë, Rostushë,  Ohër e gjithandej, Fronti,  ka mbështetjen masive të qytetarëve,  tha Xhaferi, i cili kërkoi  dhe apeloi për dalje masive të qytetarëve,  për të votuar më 8 maj. (Flutura Latifi, TVM2)