Asambleja Parlamentare e NATO-s, Kosova merr statusin e anëtares së asocuar

 

“Nga tani, Kosova do të ketë të drejtë propozimi e komentimi të çdo procesi apo dokumenti që trajtohet nga Asambleja e NATO-s. Me këtë vendim, Kosova është vetëm një hap larg anëtarësimit me të drejta të plota në NATO, gjë që sigurisht se do të ndikojë në stabilizimin e Ballkanit.”, ka theksuar ministri, Maqedonci.

 

Presidentja e Kosovës Vjosa Osmani, duke mirëpritur vendimin ka theksuar se NATO-ja është fati i Kosovës.

 

“Mirënjohës për të gjithë anëtarët që votuan në favor të ngritjes së statusit të Kosovës në atë të një anëtari të asocuar. NATO-ja është fati i Kosovës dhe kjo lëvizje do të sigurojë që zëri i njerëzve më pro NATO-s në tokë të dëgjohet.”, ka thënë Osmani në platformën “X”.

 

Asambleja Parlamentare e NATO-s është institucionalisht e ndarë nga NATO-ja, por shërben si një lidhje e rëndësishme mes NATO-s dhe parlamenteve të vendeve anëtare. Ajo përbëhet nga 281 delegatë nga të 32 vendet anëtare të NATO-s. Përveç tyre, në aktivitete të saj marrin pjesë edhe delegatë nga 9 vende të asocuara, 4 vende të asocuara mesdhetare, si dhe 8 delegacione vëzhguese parlamentare. Anëtarët e asocuar mund të paraqesin rezoluta dhe ndryshime në rezoluta pa të drejtë vote. Aktualisht janë nëntë anëtare të asocuara, në mesin e të cilave edhe Serbia dhe Bosnje e Hercegovina. Autoritetet e Kosovës kanë kërkuar anëtarësim të përshpejtuar në NATO.