Ukrainë, Stoltenberg: Sulmet ruse, të papranueshme

 

“Është thjesht e papranueshme që Rusia të vazhdojë të sulmojë një komb tjetër sovran dhe të pavarur. Ajo u demonstrua me sulmin brutal në qendrën tregtare në Harkiv. Aleatët e NATO-s dhanë mbështetje të paparë ushtarake për Ukrainën dhe unë jam shumë mirënjohës për këtë. Mbështetja ekonomike dhe humanitare për Ukrainën nga aleatët u mundësoi ukrainasve të çlironin 50% të territorit që Rusia kishte pushtuar në fillim të luftës.”, - deklaroi sekretari gjeneral i NATO-s, Jens Stoltenberg.

 

 

Të paktën 16 njerëz u vranë dhe dhjetëra të tjerë u plagosën në qytetin ukrainas të Harkivit si pasojë e një sërë sulmesh me raketa nga trupat gjatë të së shtunës, ndërsa disa njerëz rezultojnë ende të zhdukur, njoftojnë autoritet ukrainase. Këtë sulm e ka dënuar edhe përfaqësuesi i lartë i BE-së, Josep Borell, i cili e ka konsideruar si krim lufte, dhe që tregon edhe njëherë krimet dhe mizoritë që po kryen Rusia në Ukrainë. 

 

Ndërkohë, të dielën, presidenti i Ukrainës, Volodimir Zelenski, i bëri thirrje presidentit të Shteteve të Bashkuara, Xho Bajden, dhe atij kinez, Xi Jinping, që të marrin pjesë në takimin e nivelit të lartë të paqes që mbahet muajin e ardhshëm në Zvicër, ku do të shihet se kush dëshiron vërtet fundin e luftës. Rusia, nga ana tjetër thotë se nuk sheh dobi nga takimi, në të cilin deri tani Moska nuk është ftuar.