Vazhdojnë bombardimet izraelite në Gazë, dhjetëra të vrarë dhe qindra të plagosur

 

“Djali im po bërtiste: “Nënë, Nënë!”. Ai ishte në gjumë gjatë granatimeve dhe ishte errësirë brenda çadrës, fatmirësisht ne shpëtuam. Pastaj erdhi mbrojtja civile për të mbledhur trupat e djegur. Kur u afrova për të parë se çfarë ndodhi, trupat ishin kudo dhe fëmijët ishin të tmerruar duke ikur nga çadrat.”, - tha banorja e Gazës, Aja.

 

“Çfarë bëmë për ta merituar këtë? A nuk kemi të drejtë të jetojmë? Ata na thanë se kjo zonë ishte e sigurt, por ishte në shënjestër. Tani duhet të largohemi dhe nuk dimë ku të shkojmë.”, - u shpreh banorja e Gazës, Sarah.

 

“Papritur vendi mori flakë dhe njerëzit po bërtisnin dhe iknin. Fëmijët bërtisnin dhe qanin, duke thënë: "Do të na bombardojnë përsëri, do të na bombardojnë përsëri!”. Pse duhet të vdesin njerëzit e pafajshëm? Çfarë bënë ata për ta merituar këtë?”, - tha banorja e Gazës, Nuha.   

                                                                                  

Sekretari i Përgjithshëm i OKB-së, Antonio Guterres, i ka kërkuar Izraelit të ndërpresë menjëherë sulmet në Rafah në Rripin jugor të Gazës. 

 

“Problemi është se operacioni ushtarak është kryer në atë mënyrë që numri i viktimave civilë dhe shkatërrimi i infrastrukturës dhe banesave civile janë të paprecedentë, me nivele të shkatërrimit që janë absolutisht të papranueshme.”, - deklaroi sekretari i përgjithshëm i OKB-së, Antonio Guterres.

 

Edhe sekretari i përgjithshëm ka dënuar në termat më të ashpër sulmet ajrore nga Forcat e Mbrojtjes izraelite në Rafah.

 

“Shkatërrimi dhe mjerimi i shtatë muajve të fundit kanë përforcuar nevojën absolute që izraelitët, palestinezët, shtetet e rajonit dhe komuniteti më i gjerë ndërkombëtar të ndërmarrin hapa urgjent që do t'u mundësojnë palëve të riangazhohen në politikën e vonuar prej kohësh dhe rrugën për të arritur një zgjidhje me dy shtete.”, - theksoi zëdhënësi i sekretarit të përgjithshëm, Kombet e Bashkuara, Stefane Dujarric.

 

Kryeministri izraelit, Benjamin Netanjahu, nuk e ka në plan të dëgjojë thirrjet e ndërkombëtarëve.

 

"Jam këtu me ushtarët e Brigadës Golani dhe Patrullës Golani. Ky angazhim është një nga qëllimet e luftës, ne nuk po heqim dorë. Dua t'ju them se jam këtu me ju, ju dëgjoj, shoh vendosmërinë tuaj, shihni zjarrin në sytë tuaj, do t'u thosha qytetarëve të Izraelit: Ky është muri i hekurt i shtetit të Izraelit. Së bashku me këta luftëtarë të mrekullueshëm dhe miqtë e tyre do ta arrijmë edhe këtë qëllim.”, - u shpreh kryeministri izraelit, Benjamin Netanjahu.

 

Izraeli këmbëngul se nuk do të jetë në gjendje të arrijë fitoren në luftën e tij shtatëmujore kundër Hamasit në Gazë pa marrë Rafahun dhe ka hedhur poshtë paralajmërimet për pasoja katastrofike humanitare.