Ligji për rikonfigurim të kabinetit qeveritar, Gashi në koordinim me përfaqësues të partive

 

“Ne besojmë që do të japin përkrahje edhe partitë opozitare, LSDM-ja dhe “Fronti Evropian”, sepse është në drejtim të funksionalitetit dhe planifikimit për funksionimin e ri konform realizimeve të planeve programore. Ky është qëllimi dhe esenca dhe besoj se do të kalojë në Kuvend.”, - deklaroi deputeti i VLEN-it, Halil Snopçe.

 

“Për momentin punojmë në ligjin për riorganizim të organeve të administratës shtetërore, gjegjësisht rikonstruimin e ministrive të caktuara dhe pres që të kemi mbështetje nga 80 deputetë, që të mund të funksionojë ajo që është kërkesë e qytetarëve.”, - theksoi Nikolla Micevski nga VMRO-DPMNE.

 

Por, BDI-ja dhe LSDM-ja thonë se për ndryshimin e ministrive duhet parë tekstin ligjor.

 

“Nga ajo që kemi dëgjuar, kjo i shërben vetëm VMRO-DPMNE-së, pasi e kishin në programin e tyre parazgjedhor dhe disa institucione do ta udhëheqin përfaqësues jolegjitim të shqiptarëve në Qeveri, ku atje u merren kompetencat.”, - u shpreh Blerim Bexheti nga BDI.

 

“Ato ligje fillimisht duhet të vijnë në Kuvend. Nuk mund t’i japim mbështetje diçkaje që nuk e kemi parë. Duhet t’i shohim ligjet, çfarë shkruan, cili është teksti zyrtar dhe në bazë të kësaj do të marrim vendim se a do t’i mbështesim.”, - theksoi Oliver Spasovski nga LSDM.

 

Ndryshimet ligjore do të hyjnë në procedurë kah fundi i javës, por paraprakisht duhet të formohen dy komisione si filtra paraprak për ndryshimet ligjore. Aktualisht janë formuar vetëm Komisioni verifikues dhe Komisioni për zgjedhje dhe emërime. Përderisa VMRO-ja dhe VLEN-i ende heshtin për emrat e ministrave, presidentja Gordana Siljanovska Davkova, këtë javë do të ndajë mandatin Mickoskit për formimin e Qeverisë së re, i cili në afat prej 20 ditëve do të duhet të dorëzojë në Kuvend përbërjen e kabinetit dhe programin, për t’u zgjedhur Qeveria e re me shumicë votash.