Sallat kirurgjikale, vazhdojnë problemet, pritet zgjidhje

 

“Klinika për traumatologji, sëmundje ortopedike, anestezion, reanimacion dhe shërim intenziv disponon me gjashtë salla operacioni. Dy janë në pjesën e traumatologjisë dhe 4 në klinikën për sëmundje ortopedike. Dua të them se me sigurimin e kompresorëve të jashtëm deri më tani janë kryer rreth 70 operacione, gjysma në klinikën e traumatologjisë dhe gjysma në klinikën e ortopedisë. Punojmë me intenzitet më të ulët. Shembull, nëse më herët kemi brenda ditës në klinikën e ortopedisë kemi operuar 15 raste, tash në një sallë në dy ndërrime mund t’i pranojmë maksimum 7 deri 8 raste dhe përparësi kanë pacientët me sëmundje malinje dhe me frakturë.”, tha Aleksandar Trajanovski, doktor në klinikën e traumatologjisë.

 

Nga kjo klinikë mendojnë se dalangadalë do t’i kthehen punës normale por sigurisht situata varet nga sigurimi i tubacionëve të oksigjenit (kompresorëve). Me këtë problem ballafaqohet edhe klinika për anestezion, reanimacion dhe shërim intenziv. Në spitalin e përgjithshëm të qytetit të Shkupit “8 Shtatori” është rritur vëllimi i punës për 50%. Më shumë intervenime janë abdomenale, gjë që ka shtuar nevojën e rritjes së personelit. Problemet në sallat kirurgjikale filluan para tri javëve dhe akoma nuk ka raport për këtë kaos.