Sulmi izraelit në një shkollë në Gazë, dhjetëra të vdekur, mes viktimave ka edhe fëmijë

 

“Targetimi ose përdorimi i ndërtesave të Kombeve të Bashkuara për qëllime ushtarake është e turpshme dhe mosrespektim i ligjit ndërkombëtar humanitar.”, - deklaroi zëdhënësi i sekretarit të përgjithshëm të OKB-së, Stefan Dujariq.

 

 

Uashingtoni në të njëjtën vijë me Tel Avivin kërkon transparencë. Izraeli pretendon se ka shkatërruar një bombë të kurdisur të Hamasit. Sipas tyre, dy herë e kanë prolonguar sulmin për shkak të civilëve në atë zonë.

 

"Ndaluam një bombë me sahat. Është kryer një sulm preciz, i cili kishte në shënjestër tre klasa specifike ku fshiheshin terroristët.", - theksoi zëdhënësi i Mbrojtjes i Izraelit, Daniel Hagari.

 

“Kemi kontaktuar me qeverinë e Izraelit. Ata thanë në esencë atë që e thanë publikisht. Në të njëjtën kohë, ne kemi parë edhe raportet e terrenit, pamjet dhe dëshmitë e viktimave civile. Presim që ata të jenë plotësisht transparentë në publikimin e këtyre informacioneve.”, - u shpreh zëdhënësi i Departamentit të shtetit, Metju Miller. 

 

Reagon edhe komuniteti ndërkombëtar. Borrell kërkon hetim të menjëhershëm dhe përgjegjësi për sulmin vdekjeprurës. Për autoritetet palestineze, e vetmja rrugë drejt paqes është përmes njohjes së shtetit palestinez.

 

“Nëse bota dhe Izraeli duan paqe dhe stabilitet në këtë rajon, atëherë zgjidhja është unike dhe e qartë. Rruga drejt paqes shpie përmes njohjes së të drejtave të popullit palestinez dhe shtetësisë palestineze.”, - theksoi kryeministri i Palestinës, Mohamed Mustafa.

 

Iraku mbështet iniciativën e Bajdenit për armëpushim në Gazë. Hamasi është ende duke e rishikuar propozimin pasi ofensiva izraelite fokusohet në qendrën e enklavës për të ndjekur militantët që pretendojnë se janë rigrupuar atje.