Llojan, fillojnë punët ndërtimore të sallës së sportit

 

“Kjo sallë sporti, punimet tashmë i mbikëqyrëm, kapin vlerën rreth 30 milionë denarë në të cilin projekt, përveç ndërtimit të saj, do të përfshihet i gjithë mobilimi i brendshëm i saj, e cila do të jetë funksionale për nxënësit e kësaj shkolle. Gjithashtu bashkë me kryetarin e komunës përkujtuam edhe projektet tjera që kemi realizuar në këto shkolla të kësaj zone. Pra, kompletimi i këtij projekti, si dhe me fushën e jashtme multifunksionale jep dëshmi se përveç aktiviteteve mësimore brendaprogramore dhe aktiviteteve jashtëmësimore dhe realizimin e lëndëve të caktuara do ta bëjë më të denjë për nxënësit e kësaj shkolle.”, - theksoi ministri i MASh-it, Jeton Shaqiri. 

 

“Kemi bërë gjithçka që të vijmë deri te kjo ditë. Kjo ëndërr e kamotshme po bëhet realitet. Shpresoj se nxënësit e shkollës sonë do t’i kryejnë obligimet dhe detyrat e veta shkollore në kushte tashmë më të mira.”, - u shpreh drejtori i shkollës fillore “Rilindja” -  Llojan, Idriz Sulejmani. 

 

“Është një projekt kapital, një kërkesë e kamotshme të këtyre dy fshatrave dhe me këtë do ta rrumbullakësojmë infrastrukturën e shkollës dhe do të vazhdojmë me sistemin kabinetik, shpresoj se në bazë të planit do të kryhen punët ndërtimore e që ta gëzojnë nxënësit, por edhe banorët e të dy fshatrave.”, - theksoi kryetari i komunës së Likovës, Erkan Arifi. 

 

Ndryshe, kjo shkollë deri më tani nuk ka pasur sallë sportive, aktivitet e lëndës së edukatës fizike nxënësit i kanë realizuar në oborrin e shkollës, si dhe në fushën e hapur të sportit. Projekti në fjalë pritet të përfundojë deri në dhjetor, por që  mund të përfundojë edhe para afatit të caktuar.