Iljas Veseli do ta zëvendësojë Blerim Bexhetin në komunën e Sarajit

Pasi kryetari i Komunës së Sarajit, Blerim Bexheti, mori mandatin e deputetit, në vend të tij deri në zgjedhjet  e ardhshme lokale do të jetë Iljas Veseli, këshilltar në këtë komunë.

“E përgëzova misionin e ndërmarrë nga z. Iljas Veseli. Po ashtu shpreha gatishmërinë për mbështetje të parezervë, me të vetmin qëllim që Komuna e Sarajit të ruajë dinamikën e realizimit të projekteve që janë me interes për të gjithë banorët e komunës sonë”, - ka bërë të ditur Bexheti përmes një postimi në profilin e tij në “Facebook”.

Me rastin e fillimit të angazhimit të Iljas Veseli si zëvendëskryetar, thekson në postim Bexheti, kisha nderin që bashkë me kryesuesin e Këshillit komunal Musa Alili të bashkëbisedojmë në lidhje me situatën e krijuar, si dhe për mbarëvajtjen e proceseve të punës, në bazë të kompetencave ligjore.