Enti shtetëror i revizionit: Detektohen gabime në funksionimin e FSSh-së

 

"Mosekzistenca e një sistemi të integruar të lëshimit të udhëzimeve, raporteve mjekësore dhe llogaritjeve për shërbimet shëndetësore të kryera, që janë bazë për përgatitjen e faturave mujore, krijon rrezik për neglizhencë dhe gabime. Kontrolli i sistemit dhe manual në procesin e përshkrimit  dhe lëshimit të ilaçeve, nuk janë mirë të vendosura dhe të zbatuara dhe ekziston rreziku i pagimit të faturave për receta të ndryshme në formë dhe vëllim që dallon nga realiteti.", thuhet në raportin e Entit shtetëror të revizionit. 

 

Nuk janë kryer kontrolle financiare për shpenzimet e mjeteve  për furnizimin  dhe evidencën e barnave dhe për shërbimet shëndetësore të kryera. Ekzistojnë dobësi dhe paqartësi  edhe në procedurën për trajtim në shtetet e huaja, konstatuan revizorët.

 

"Në procedurën për trajtim në shtetet e huaja për personat e siguruar ekzistojnë dobësi dhe paqartësi, ku nuk është siguruar mbrojtja ligjore adekuate  për kërkuesit dhe nuk është vendosur kontrolli dhe sistemi për monitorimin e suksesit të trajtimit në shtetet e huaja. Kërkesat për avancat e dhëna për trajtimin në shtetet e huaja janë regjistruar pjesërisht dhe nuk janë vendosur kontrolle të përshtatshme për konfirmimin e faturave nga spitalet e huaja. Kjo situatë ka rezultuar në kërkesa ankuese nga spitali i huaj, për të cilat ka paqartësi për rezultatin përfundimtar.", thuhet nga Zyra Shtetërore e Revizionit. 

 

Institucionet publike shëndetësore dhe Fondi për Sigurimin Shëndetësor nuk kanë bërë  analizë edhe për ndryshimin aktual të kostove të shërbimeve dhe përditësimin e listës së barnave në ngarkesë të Fondit, thuhet në raportin e Entit shtetëror të revizionit.