Ballkani Perëndimor, disa vende përballen me ndërprerje të rrymës

 

Operatori i Sistemit të Transmetimit në Shqipëri tha se shkaktarët e ndërprerjes së rrymës kanë qenë volumet e larta të transmetimit dhe temperaturat ekstreme, që kanë shkaktuar defekte në linjën e interkoneksionit me Greqinë.

 

“Defekti ka filluar nga linja e interkoneksionit me Greqinë dhe më pas ka vazhduar me efekt kaskadë në të gjithë vendin.", tha OST-ja përmes një njoftimi, duke shtuar se po merren masa për rikthimin e energjisë elektrike për të gjithë konsumatorët.

 

Sistemi për shpërndarjen e rrymës në Mal të Zi njoftoi përmes një postimi në Fejsbuk se ka ndërprerje të energjisë elektrike dhe se pothuajse i tërë vendi është pa rrymë. Edhe Kroacia njoftoi se disa pjesë të vendit janë përballur me ndërprerje të rrymës. Operatori i Pavarur i Sistemit në Bosnje e Hercegovinë tha se “nuk ishte e mundur të parandalohej kolapsi i sistemit të energjisë elektrike” në këtë shtet. Probleme me rrymë nuk janë raportuar në Kosovë, Serbi dhe Maqedoni të Veriut.