Ukrainë, Rusia shënjestron rajonin e Kievit me raketa

Rusia ka nisur tri raketa drejt rajonit të Kievit në orët e para të mëngjesit, teksa rritet numri i viktimave nga sulmet me bombë ruse në qytetin e Harkivit, të një ditë më parë.

Forca ajrore e Ukrainës ka thënë se ka rrëzuar dy prej tri raketave të nisura në rajonin e Kievit. Për këtë sulm është raportuar pak pasi Rusia ka nisur sulme të shkallës së gjerë, me raketa dhe dronë, për të shënjestruar infrastrukturën ukrainase të energjisë.

Sulmet kanë dëmtuar sistemet e shpërndarjes së energjisë në rajonet e Zaporizhjas dhe Lvivit.

Autoritetet ukrainase kanë thënë se ky është sulmi i tetë i madh në sistemin shtetëror të energjisë në tre muajt e fundit.

Bombardimet në Harkiv, qytetin e dytë më të madh Ukrainës, janë përshkruar si sulm ndaras. Tre njerëz janë vrarë në Harkiv, ndërsa të paktën 56 janë plagosur, sipas autoriteteve ukrainase.

Presidenti ukrainas, Volodymyr Zelensky, i cili ka bërë thirrje së fundmi për marrjen e masave për të mbrojtur sistemin ukrainas të energjisë, ka thënë më 22 qershor se Rusia ka lëshuar më shumë se 2.400 bomba në Ukrainë këtë muaj, 700 vetëm në Harkiv.

Zelensky ka përsëritur lutjen ndaj Perëndimit për mbrojtje shtesë ajrore dhe që Ukrainës t’i mundësohet që të shkatërrojë aeroplanët luftarakë rusë “kudo që janë”.

Më 23 qershor, zyrtarët rusë kanë bërë të ditur se Ukraina ka lëshuar dhjetëra dronë në territorin rus.