Përgatitja e të rinjve për tregun e punës, mbi 30 të rinj ndjekin falas kursin e IT-së

 

“Kjo nismë është projektuar për të hapur dyert për të rinjtë, duke i pajisur ata me aftësitë më të kërkuara në botën e sotme digjitale. Duke zotëruar këto aftësi, pjesëmarrësit tanë të rinj, jo vetëm që do të sigurojnë të ardhmen e tyre, por do të kontribuojnë në përparimin teknologjik në komunitetin tonë.”, - deklaroi Nexhat Lika nga Organizata Humanitare “Kalliri i Mirësisë”. 

 

Këta të rinj, pas përfundimit të projektit mund të inkuadrohen shpejt në tregun e punës, por mund të krijojnë edhe bizneset e tyre private dhe të hapin vende të reja pune për të tjerët, tha Muhamed Sulejman nga Organizata Humanitare “Islamik Relief”, që është pjesë mbështetëse e këtij projekti.

 

“Të rinjtë që do të trajnohen në Softvere të ndryshme do të marrin certifikata të pranuara ndërkombëtarisht dhe do të zhvillojnë aftësitë e tyre në fushën përkatëse. Besojmë se ky projekt do t’i ndihmojë të rinjtë që të fillojnë bizneset e tyre. Urojmë që pas përfundimit të këtij projekti të festojmë për 30 afaristë të rinj, që do t’i kontribuojnë shoqërisë në të ardhmen.”, - theksoi Muhamed Sulejman nga Organizata Humanitare “Islamik Relief”.

 

Në kohën e sotme ku gjithçka bëhet përmes teknologjisë, IT-njohuritë janë shumë të rëndësishme, prandaj të rinjtë janë më të interesuar për këtë lëmi.

 

“Jo rastësisht i kemi përzgjedhur këto dy trajnime paraprakisht me “Kallirin e Mirësisë”. I kemi zgjedhur për faktin se janë dy prej fushave që sot kërkohen më së shumti në treg. Nëse e përvetësoni materialin, ju do të keni mundësi të mëdha.”, - u shpreh drejtori i shkollës “Infotech”, Burim Sherifi.

 

Organizata Humanitare “Kalliri i Mirësisë” dhe Organizata Humanitare “Islamik Relief” kanë realizuar dhjetëra projekte edukativo-arsimore në territorin e Republikës, pasi sipas tyre, arsimimi është baza për ringritjen e shoqërisë.