Të shtëna me armë në Çair, u plagos një 31-vjeçar nga Shkupi

 

‘Mbrëmë në ora 21:50 në SPB-Shkup është lajmëruar se në Spitalin e Përgjithshëm të Qytetit “Shën Naumi i Ohrit” është sjellë 31-vjeçari, D.B., nga Shkupi, i cili ka qenë i lënduar nga armë zjarri në territorin e Çairit në Shkup. Po ndërmerren masa për zbardhjen e plotë të rastit.”, - deklaroi zëdhënësi i MPB-së, Goce Andrejevski. 

 

Lidhur me këtë rast kanë reaguar nga LSDM-ja opozitare, duke theksuar se me qeverisjen e VMRO-DPMNE-së të shtënat dhe përleshjet kriminale po vazhdojnë të ndodhin dhe situata e sigurisë po bëhet jashtëzakonisht e keqe.

 

“Paaftësia e VMRO-DPMNE-së inkurajon kriminelët dhe e kthen Maqedoninë në Perëndim të egër. Nuk ka zgjidhje për krimet më të rënda. Prej se Toshkovski dhe VMRO-DPMNE-ja janë në krye të MPB-së, pesë vrasje mbeten të pazbardhura dhe kjo inkurajon personat e armatosur dhe banditë.”, thonë nga LSDM-ja. 

 

Përndryshe, sipas të dhënave jozyrtare thuhet se përleshja me armë ka ndodhur mes dy grupeve kriminale, të cilat janë takuar për t’u pajtuar, por sipas të gjitha gjasave takimi i tyre nuk ka shkuar siç duhet.

 

Megjithatë institucionet nuk na konfirmuan një gjë të tillë, duke thënë se hetimi është i hapur, kurse më tepër detaje do të japin kur hetimi do të ketë epilog.