Komiteti i Helsinkit: Shqetësuese rritja e gjuhës së urrejtjes në media

 

Pas publikimit të aferës së përgjimeve masive nga ana e opozitës, Komiteti i Helsinkit vëren rritje të gjuhës së urrejtjes ndaj anëtarëve të shoqatave qytetare dhe të aktivistëve të partive politike të cilët çdo ditë përballen me një kampanjë agresive, duke u etiketuar si tradhtarë, komunjarë, sorosoidë etj.

 

Kjo, sipas Komitetit të Helsinkit, bëhet me qëllim të imponimit të percepsionit se të njëjtët punojnë kundër interesave shtetërore. 

 

“Shqetësuese janë sidomos keqpërdorimi i mediave nga individë dhe lëvizje qytetare, të cilët përmes mediave nxisin urrejtje ndaj individëve apo grupeve të tjera që nuk mendojnë njësoj për punën e qeverisë dhe partive qeverisëse”- thuhet në raportin e fundit të  Komitetit të Helsinkit për mediat. 

 

Komiteti i Helsinkit shpreh shqetësim edhe për thirrjet për dhunë nga ana e fytyrave publike që deklarohen si gazetarë, si dhe për përdorimin e rrjeteve sociale dhe mediave, për qërim hesapesh me ata që nuk mendojnë njësoj me ta. 

 

“Komiteti i Helsinkit fton institucionet përgjegjëse të marrin masa dhe të distancohen nga kjo dukuri, në të kundërtën do të vlerësojnë se jeni pjesëmarrës të drejtpërdrejtë në krijimin e atmosferës së frikës dhe se i miratoni veprimet e tilla”-  thuhet në raportin e Komitetit të Helsinkit.