Nuk arrihet marrëveshje në Kajro, vazhdojnë luftimet në Gazë

 

"Jemi  të shqetësuar për shkak se konflikti mund të përshkallëzohet në një luftë rajonale gjithëpërfshirëse që nga 7 tetori dhe kemi punuar gjatë gjithë kohës me partnerët dhe aleatët. Vazhdojmë të punojmë për të parandaluar një rezultat të tillë dhe shpresa jonë është që ngjarjet e natës së kaluar të mos eskalojnë në një luftë rajonale.”, - deklaroi këshilltari i Sigurisë Kombëtare të ShBA-së, Xhek Salivan. 

 

Forcat e Mbrojtjes të Izraelit thonë se Hezbollahu nuk ka arritur të sulmojë asnjë bazë ushtarake, derisa mijëra raketahedhës të grupit militant u shkatërruan në më shumë se 40 vende.

 

“Vetëm javën e fundit kemi eliminuar rreth 30 terroristë, duke përfshirë komandantët e Hezbollahut. Rreth 90% të objektivave ishin raketa me rreze të shkurtra veprimi që synonin veriun e vendit. Ne e kemi zbuluar Hezbollahun prej javësh me mjete teknologjike dhe patrulla ajrore me avionë të Forcave Ajrore. Zbuluam se ata synonin të kryenin sulme dhe i eliminuam shumicën e tyre.”, - theksoi zëdhënësi i Forcave të Mbrojtjes Izraelite, Daniel Hagari.

 

Pas një sulmi masiv me raketa në veri të Izraelit dhe në lartësitë e Golanit, lideri i Hezbollahut dëshmon se sulmi hakmarrës ndaj Izraelit për vrasjen e një prej komandantëve të tij ka përfunduar.

 

“Pretendimet e armikut se ata goditën raketa strategjike balistike, se shpëtuan Tel Avivin së bashku me objektet e tjera jetike dhe shkatërruan këto raketa janë të gjitha gënjeshtra. Ne nuk kishim ndërmend t'i përdornim këto raketa tani, por mund t'i përdorim ato në të ardhmen.”, - u shpreh lideri i Hezbollahut, Hasan Nasrallah. 

 

Hezbollahu ka kryer sulme ndaj objektivave izraelite që nga fillimi i luftës në Gazë më 7 tetor. Grupi thotë se do të ndalojë bombardimet në momentin që arrihet një armëpushim.