Mickoski: 2.500 denarë më shumë për pensionistët

 

“Ne premtuam se në vitin e parë pensionet do të rriten në mënyrë lineare  për 5.000 denarë, por ne do ta bëjmë këtë shumë shpejt apo për nëntë muajt e parë. Do të shohim më tutje se si do të jetë gjendja me buxhetin, por edhe në të ardhmen mund të ketë surpriza të këndshme për pensionistët, por edhe për punëtorët.”, - deklaroi kryeministri, Hristijan Mickoski. 

 

 

Kanë reaguar nga opozitarja LSDM, të cilët thonë se VMRO-ja po i gënjen pensionistët dhe po vë në rrezik funksionimin normal të Fondit Pensional. 

 

“Në realitet pensionistët do të marrin rritje prej vetëm 1.000 denarëve, që  është shumë larg nga ajo që u është premtuar dhe larg nevojave të grupit më të rrezikuar në shoqëri. Me vendimin e fundit të Qeverisë, pensionistët u zhgënjyen kur kuptuan se në muajin shtator nuk do të kenë 5.000 denarë shtesë në llogaritë e tyre.”, thuhet në kumtesën e LSDM-së.

 

Nga LSDM-ja me kritika për pushtetin edhe për rritjen e pagave në arsim nga ku thonë se mësimdhënësit nuk do ta marrin rritjen e pritshme të pagave prej 12% në shtator.

 

“Revolta është e madhe, por edhe zhgënjimi i mësimdhënësve nga qeverisja e DPMNE-së. Mësuesit nuk do ta marrin rritjen e pritshme prej 12% në shtator, edhe pse Mickoski dhe DPMNE-ja kanë premtuar. Ata kanë shkelur premtimin për avancimin e arsimit.”, - theksoi Daniela Nikolova nga LSDM.

 

Kryeministri Mickoski, ditë më parë, sa i përket paralajmërimeve për rritje të pagave deklaroi se buxhet për rritje të pagave për këtë vit nuk ka dhe se rritje mund të ketë vitin e ardhshëm, por edhe atë në varësi të gjendjes së buxhetit.