Mexhiti në Tiranë takon krerët e shtetit

 

Në njoftimin e presidencës thuhet se gjatë takimit u nënvizua nevoja për thellimin e marrëdhënieve mes Shqipërisë dhe Maqedonisë së Veriut në ekonomi, shkëmbimet tregtare, infrastrukturë, turizëm e kulturë, si dhe bashkëpunimi për avancimin e procesit të integrimit evropian e të nismave rajonale.

 

Begaj vlerësoi rolin e patjetërsueshëm të faktorit shqiptar në Maqedoninë e Veriut për paqen, sigurinë, zhvillimin e qëndrueshëm dhe orientimin e palëkundur euroatlantik, ndërsa u theksua rëndësia e një angazhimi të përbashkët për të avancuar me tej procesin e integrimit në BE.

 

Në rrjetet sociale edhe zëvendëskryeministri Mexhiti zbardhi pjesë nga takimi, ku thuhet se diskutimet u përqendruan në projekte me interes strategjik për të dy vendet, siç janë korridori i 8-të, hekurudha Kërçovë-Lin, largpërçuesi Manastir-Elbasan dhe projekte të tjera të cilat shërbejnë si ura lidhëse.

 

“Në këtë frymë u shpreh edhe ideja për organizimin e një eventi të përbashkët trepalësh mes Maqedonisë së Veriut, Shqipërisë dhe Kosovës për të përkujtuar Kongresin e Manastirit, një moment historik që simbolizon unitetin dhe forcën e kombit tonë.”, shkruan Mexhiti.

 

Mexhiti ishte i ftuar në Konferencën e Ambasadorëve të Shqipërisë dhe në ditën e parë të vizitës ai u prit edhe nga kryeministri, Edi Rama; kryetari i Bashkisë së Tiranës, Erjon Veliaj; si dhe nga ministrat Hasani, Vëngu dhe Kumbaro.