Reformat në gjyqësor, Kostadinovski: Përgjegjësia të jetë individuale

 

 

“Gjithmonë pa përjashtim përgjegjësia individuale nëse konstatohet, mbi çfarëdo baze, korrupsion, ndikim, shpërdorim detyre dhe autoriteti, shkelje të ligjeve etj., brenda çdo organi. Jam i bindur se kjo mënyrë do të ketë një efekt më të mirë për të rritur parimet e përgjegjësisë në përgjithësi  dhe do të ndikojë pozitivisht në besimin dhe sundimin e ligjit sesa pëgjegjësia kolektive, e cila si precedent i keq mund të na fusë në një labirint nga i cili nuk do të mund të dalim për një kohë të gjatë”, u shpreh Kryetari i Gjykatës Kushtetuese, Darko Kostadinovski.

 

Ai thotë gjithashtu se nuk do të donte të vinte në një situatë që propozuesi i reformave të mbështetet nga qytetarët dhe Gjykata Kushtetuese të perceptohet si frenuese nëse konstaton se reformat mundshme janë problem kushtetues.

 

Propozimet e qeverisë së re të udhëhequr nga VMRO-DPMNE, e që kanë të bëjn me shpërbërjen e Këshillit Gjyqësor dhe Këshillit të Prokurorëve Publikë u kritikuan edhe nga bashkësia ndërkombëtare.Megjithatë edhe përkundër kritikave, Qeveria thotë se nuk heq dorë nga kjo ide.

 

Njëherit ,para gjykatësve kushtetues së shpejti janë edhe nismat për kushtetutshmërinë e Ligjit për përdorimin e gjuhëve dhe për balancuesin për të cilat kanë reaguar Vlen dhe Fronti Evropian.

 

Sipas VLEN, nisma që vjen nga E Majta duhet të refuzohet ndërsa sipas Frontit Evropian, shkelje e mekanizmave dhe të drejtave që dalin nga Marrëveshja e Ohrit, nuk është gjë tjetër veçse kthim para Marrëveshjes së Ohrit.