Rusia dhe Ukraina, me akuza reciproke për civilë të vrarë

 

“Natë jashtëzakonisht e vështirë për të gjithë ne. Civilët u vranë sërish si pasojë e granatimeve të qytetit të Belgorodit nga forcat e armatosura të Ukrainës. "Pesë njerëz vdiqën dhe 37 janë në spital, duke përfshirë një fëmijë", u shpreh guvernatori i Belgorodit, Vyacheslav Gladkov.

 

Sulmi është përgjigja e Ukrainës ndaj bombardimeve ruse të zonave civile në Kharkiv dhe Sumy, të cilat vranë gjashtë persona dhe plagosën mbi 50.

 

"Të gjitha bombat goditën ndërtesat civile, dy prej të cilave ishin pranë një parku ku kishte shumë njerëz, duke përfshirë fëmijë," theksoi zëdhënësi i zyrës së prokurorit rajonal të Kharkiv, Oleksandr Filchakov.

 

"Pas meje është një pallat". Ky është terror masiv kundër popullatës sonë civile”, u shpreh guvernatori i Kharkivit, Oleh Siniehubov. 

 

Ushtria ukrainase ka konfirmuar se situata në Pokrovsk është më e vështira, por se po përparon në Kurskin rus, pavarësisht pretendimeve të mbrojtjes ruse se po zmbraps kundërshtarin me sukses.

 

“Betejat po zhvillohen pothuajse në të gjitha drejtimet, situata në Pokrovsk është më e vështira. Armiku përpiqet të thyejë mbrojtjen tonë, por sulmet zmbrapsen. Përsa i përket Kurskut, ofensiva ka vazhduar, ne po përparojmë deri në 2 kilometra në të gjitha drejtimet”, u shpreh komandanti i Përgjithshëm i Forcave të Armatosura të Ukrainës, Oleksandr Siriskyi.

 

“Është kryer një operacion për neutralizimin e ushtrisë ukrainase në rajonin e Kurskut. Ata pësuan humbje të konsiderueshme në fuqi punëtore dhe pajisje, duke i penguar ata të tentojnë të dislokojnë rezervat e armikut”, theksoi zëdhënësi i Ministrisë ruse të Mbrojtjes, Igor Konashenkov.

 

Në të njëjtën kohë, Zelensky shkarkoi komandantin e Forcave Ajrore pa e theksuar arsyen. Vendimi vjen pasi një avion luftarak F-16 u rrëzua teksa po i shmangej një sulmi raketor rus.

 

“Më në fund, ne duhet t'i japim fund taktikave terroriste ruse. “Ukraina duhet të fitojë aftësinë për të shkatërruar avionët rusë në bazat e tyre”, u shpreh president i Ukrainës, Volodymyr Zelenskyi.

 

Ministrat e mbrojtjes të BE-së njoftuan se do të forcojnë stërvitjen ushtarake të Ukrainës - konfirmoi kreu i diplomacisë evropiane Borel, duke shtuar se deri në fund të vitit do të trajnojnë 15 mijë ushtarë të tjerë ukrainas.