Qeveria shpall thirrje publike për komunat, planifikohen 250 milionë euro për projekte kapitale

Me 250 milionë euro të siguruara nga Qeveria do të stimulohet zhvillimi i komunave dhe do të përmirësohet jeta e qytetarëve.  Qeveria ka publikuar  thirrje publike përmes së cilës komunat do të aplikojnë me projekte infrastrukturore dhe kapitale në bazë të kritereve dhe procedurave të përcaktuara më parë.  Komunat kanë afat 7 ditë që të plotësojnë formularin dhe më pas në afat prej 10 ditëve duhet të dorëzojnë dokumentacionin e plotë.

“Komunat mund të aplikojnë me një ose më shumë projekte infrastrukturore në fushën e kulturës, sportit, mjedisit, infrastrukturës rrugore, si dhe në fushën e politikës sociale dhe arsimit. Afati për plotësimin e formularit është shtatë ditë dhe i njëjti i plotësuar me projekte nga komuna duhet të dorëzohet në Ministrinë e Vetëqeverisjes Lokale. Më pas, brenda 10 ditëve, dokumentacioni i plotë dorëzohet nga komunat pranë ministrisë përkatëse në zonën e projektit, ku do të bëhet vlerësimi. Vlerësimi pritet të përfundojë në një afat jo më të gjatë se 10 ditë.”, - deklaroi ministri i Vetëqeverisjes Lokale, Zllatko Perinski.

Me thirrjen e parë publike që fillon prej 5 shtatorit dhe zgjatë deri më 11 shtator janë vënë në dispozicion 100 milionë euro.

“Po i dërgoj një apel sa më shumë komunave, pavarësisht prejardhjes politike të kryetarëve të komunave, që të marrin pjesë në këtë thirrje. Ne jemi Qeveri e të gjithë qytetarëve dhe synimi ynë është të përmirësojmë jetën e të gjithë qytetarëve. Këto para nënkuptojnë më shumë projekte dhe zgjidhje për qytetarët për rrugë të reja, bulevarde, shkolla, kopshte, kanalizime, gjithçka që u nevojitet në thelb qytetarëve.”, - theksoi kryeministri, Hristijan Mickoski.

Paratë do të shpërndahen përmes gjashtë ministrive, të Kulturës dhe Turizmit, Transportit, Ministrisë së Politikës Sociale, Arsimit, si dhe Mjedisit dhe Sportit. Ndërsa për monitorimin e gjithë procesit është krijuar një organ koordinues qeveritar, i cili do të udhëhiqet nga Ministria e Vetëqeverisjes Lokale dhe në të do të marrin pjesë përfaqësues të ministrive përkatëse. (Sanije Duraku, TVM2)