BDI Gostivar akuzon komunën e Gostivarit: Çerdhet dhe shkollat janë në kolaps financiar

 

“Të gjindur para fakteve drejtuesit e Komunës së Gostivarit e konfirmuan borxhin dhe tentuan që me arsyetime banale të justifikojnë veprimet e tyre, që çuan çerdhet, shkoillat fillore dhe të mesme drejt kolapsit financiar. Duke tentuar të kamuflojnë keqmanexhimin e tyre me shkollat dhe çerdhet u arsyetuan se borxhi qenka krijuar si pasojë e krizës në Lindjen e Mesme dhe në Ukrainë, një arsyetim qesharak dhe i neveritshëm pasi tentojnë që mashtrojnë qytetarët me arsyetim të pajustifikueshëm për aferat e tyre financiare.”, tha Gajur Sejdini, këshilltar i BDI-së në Gostivar.

 

 

Por në reagimin e ASH-së dega Gostivar mohoen këto akuza duke thënë se Komuna e Gostivarit po përgatit një sërë projektesh të rëndësishme që synojnë të përmirësojnë jetën e përditshme të qytetarëve. 

 

“Komuna e Gostivarit përballet aktualisht me një borxh prej 556.839.788 denarë, ndërkohë që qytetarët dhe bizneset i detyrohen komunës 289.549.396 denarë. Pavarësisht këtyre sfidave financiare, komuna ka treguar një mirëkuptim të madh gjatë pandemisë dhe krizës energjetike, duke mbështetur borxhlinjtë e saj. Për t'u përballur me këto vështirësi, po punohet për rritjen e bazës tatimore përmes rivlerësimit të pronave, si dhe është planifikuar aplikimi për obligacione përmes Ministrisë së Financave.”, thuhet në reagimin e ASH-së dega Gostivar.

 

Nga ASH dega Gostivar poashtu shtojnë se Ministria e Arsimit do të shlyejë borxhet e saj, ndërsa në bashkëpunim me UNDP po krijohet një sistem inovativ online për pagesën e taksave.